Noh synniang u Bah Kordor bad ka ïing da ka jaka ban tei ïing Shnong ha Lawjynriew

Ka Dorbar Shnong Lawjynriew hynne ka sngi ka la ïoh ban plie paidbah ïa ki ar tylli ki kamra shong jingïalang jong ki nongkitkam ka Shnong kaba don ha Dong Lumbaduk. Kane ka jingtei ïa katei ka ïing shnong ka dei ka jaka kaba la ai sngewbha da u Bah Kordor Marbañiang bad ka ïing ka sem jong u. Ia ka iing la plie paidbah da u MLA ka Nongthymmai constituency u Bah Charles Pyngrope bad u trai jong kane ka jaka ba la pynïeng ïa kane ka ïing treikam jong ka shnong, u Bah Kordor Marbañiang. Kane ka jingplie ïa ki tei ki kamra shnad treikam jong ka Shnong ka dei kum shibynta ba ka Dorbar Shnong Lawjynriew kan sa plie pyrda ïa ka jingrakhe ïa ka jingdap ba 150 snem jong kane ka shnong.

Ha kane ka sngi la sdang ban plie nyngkong ïa ka Conference Table ha ka mala kaba saw kaba long ka kamra shong jingïalang jong ki nongkit kam jong ka Dorbar Shnong, ïa kaba la khap Ribon da u Bah Charles Pyngrope ryngkat ka jingsakhi lang u Bah Kordor Marbañiang, u Rangbah Shnong u Bah SB Kharshandi, u Secretary shnong, u Treasurer, kiwei de ki nongkit kam shnong bad ki nongshong shnong. 

Hadien ka jingplie ïa ka Conference Table, la ïoh ban plie sa ïa kawei pat ka kamra shong jingïalang ha ka mala kaba lai, ha kaba la khap ribon da u Bah Kordor Marbañiang bad ïa kane ka kamra la ai nam ha kyrteng jong u Kpa jong u Bah Kordor Marbañiang kaba la khot ‘Dwet Sing Rymbai Hall’. Ia ka Conference Table la tei ha ka jinglut kaba kot T.4.42 lak lyngba ka MLA Scheme katba ka jingtei ïa ka Dwet Sing Rymbai Hall, la tei ha ka jinglut kaba kot T.8 lak.