Ïeng ka Ekalavya Model Residential School ha Sohparu, 3 bnai yn tei dep noh

Ka jingtei ïa kawei ka skul bah kaba la tip kum ka Ekalavya Model Residential School mynta ka la sdang ban ïeng khriak namar la ïohi lyngba ki dak ki shin ba la kumba 80 % ei ei katei ka skul ka la dep ban shna. Katei ka skul ka dei kaba buh mawnongrim da u MLA barim ka Nongstoin Constituency u Bah Macmillan Byrsat ha u lber jong u snem 2019 bad ia ka jaka la ai sngewbha da ka kong B. kharbani ha ka jingheh kaba 13 acre.  U nongthoh khubor haba u la pyrshang ban leit jngoh ïa katei ka Shlem u la lap ba kiba bun ki bynta la sdang dep bad satang katto katne ki bynta kiba dang sah hynrei wat ïa kita ruh la ïohi ba ki kam ki dang ïaid shait shait naduh ka jingker ïa u pud sawdong jong katei ka Shlem ki ïing pakka bad kiwei kiwei.

Katei ka skul ïa kaba la tei ha ka shnong Sohparu kawei na ki shnong ha ka thaiñ Nongkhnoum ha ka thaiñ Nongstoiñ West Khasi Hills District kan long shisha ka jingkyrkhu kaba khraw ïa ki paid nongshong shnong jong katei ka shnong kumjuh ruh ïa ka dong ka thaiñ bad ïa ka jylla hi baroh kawei namar la ong ba ha katei ka shlem Yn ñiam kumba 500 ngut eiei ki khynnah pule, Yn don ruh ka jaka sah ne hostel na ka bynta ki kynthei, bad kan long kaba la biang pura na ka bynta ki khynnah pule saïan ha kaba Yn don ruh ka Laboratory Room na ka bynta ki khynnah pule Physics bad Chemistry.

Kumban shu pyntip ba katei ka shlem kadei kaba la pyntreikam da ka National Education Society (NES) lyngba ka Ministry of Tribal Affairs, jong ka sorkar India bad la ong ruh ba satang hadien 3 bnai eiei la lah ban tei dep pura ïa katei ka Shlem. U nongthoh khubor u la ïoh ruh ban ïakren bad u Sushant Majee uba dei u sites Engineer jong katei ka project uba la pynshisha ruh da kaba u la ong ym slem shuh ban tei dep ïa katei ka shlem namar la jan dep lut baroh khoit.