Ioh bat ki pulit 5 ngut ki samla ba suba donkti khaii drok

Da ka jingtrei shitom ban rad dyngkhong ia ka jingioh laitlan ka jingrung jingmih jong ki nongkhaii drok kumjuh ruh ia kiba pyndonkam ia u ne u jingdih buaid, ki pulit ka Ri Bhoi District ki la ioh ban bat ia 5 ngut ki samla kiba la kynnoh donkti ha kaban pyndonkam ia u drok najan kawei ka shnong Umshangling ha Nongpoh.

Katkum ka jingiathuh da u Additional Superintendent of Police (ASP) ka Ri Bhoi District, u Bah Jason Mairom, u la iathuh, ba ki pulit ki la ioh ban bat ia kitei ki 5 ngut ki samla ba la kynnoh ban pyndonkam ia u drok ka dei hadien ka jingioh jingtip halor ka iaid ka ieng jong ki, bad ki pulit hadien ba ki la kthong ia kawei ka autorickshaw kaba ki pyndonkam ki la bat ia ki bad ha ka jingtalasi ki la lap tang ia u tyrnia injek ban pyndonkam ia u drok bad shibun ka pisa.

La iathuh ruh, ba ia ka kyrteng jong kitei ki briew la buhrieh shwa bad la rah ia ki sha Nongpoh Police Station ban pynlong ia ka jingtohkit ha kaba la pyntip ruh sha ki bahaiing hasem jong ki, halor ka jingdonkti jong ki ban pyndonkam ia u drok. Shuh shuh ruh, u ne u heh pulit, u la iathuh ba na ka liang ka tnad pulit hi kan iai treishitom ban rad dyngkhong ia u drok na kane ka district kaba dei ruh ka khyrdop kaba kongsan ban rung ban mih sha kane ka jylla, ha kaba la maham ruh ia kito kiba donkti ban khaii drok ba kin kiar noh na kane ka kam lym kumta kin ngat ha ka jingpynshitom katkum ki kyndon ain.