Ioh khusnam 11 ngut ki nongialam shnong halor u synniang ba pynioh umdih ha ki thain kyndong

Khadwei ngut ki nongmihkhmat ka imlang sahlang na ka jylla Meghalaya ki la shah pynkup burom ha ka jingialang National Jal Mahotsav kaba la long ha New Delhi namar ka jingnoh synniang ban pynkhlain ia ki sienjam ban pynpoi umbam umdih ha ki thain nongkyndong lyngba ka skhim Jal Jeevan Mission.

Ïa ki khusnam la sam ha ka program ba la pynlong da ka Department of Drinking Water & Sanitation hapoh ka tnat Jal Shakti, ha kaba ka President ka Ri India ka Droupadi Murmu ka la ïalam ïa ka jinglehniam Jal Kalash bad ai khublei ruh ïa ki nongshah pynkup burom namar ka jingnoh synniang jong ki ban kyntiew ïa ka rukom pynpoi umbam umdih ha ki thain nongkyndong.

Na Meghalaya, la ai jingithuh ia ki shnong bad ki nongialam shnong na ka bynta ki jingjop jong ki ha kaba pynthikna ia ka jingpynpoi um, ka jingpynneh pynsah ia ka rukom pyndonkam pisa ban pyntreikam ia ka skhim ha ki shnong, bad ka jingpeit bniah ia ka jinglong jingman jong ka um.

Napdeng kiba la ïoh khusnam ki kynthup ka shnong Massar (Pynursla Block) ka la ïoh ïa ka jingithuh na ka bynta ban pynneh pynsah ïa ka jingpoi umbam umdih kaba 24×7, bud sa ka shnong Nongdewsaw (Ranikor Block) bad ka shnong Pahamjri (Umling Block).

Ki shnong kiba pyni ia ka jinglong ba khlain ha ka liang ka pisa lyngba ka jinglum bai pyndonkam kaba paka ki kynthup ia ka Nongsohpian (Block Nongstoin), Jendragre (Block Rongram), bad Tynriang (Block Pynursla).

La pynkup burom ruh ïa 2 ngut ki nongialam shnong hapoh ka thup Distinguished Sarpanch/Headman Award na ka bynta ka jinglah jong ki ban pynneh iaki kor um kata u Bah Spiland Jyrwa na ka shnong Pyndendiwah (Block Mawkyrwat) bad u Bah Aikolos Ramri na ka shnong Umsaw (Block Nongstoiñ).

La ai jingithuh ruh ïa ki kynthei kum ki nongjop ha ka imlang sahlang halor ka jingtrei jong ki ha ka jingpeitngor ïa ka jinglong jingman ka um da kaba pynshong nongrim katkum ka Field Test Kit (FTK), ba kynthup ïa ka Kong Elitamary Lyngdoh na ka shnong Jashiar (Block Mawkyrwat) bad ka Memorialda Syiem na ka shnong Tiehsaw (Block Nongstoiñ).

Ka jingthmu ka ai jinghikai ia ki kynthei kynthup ia ki nongtrei ASHA, ki nongtrei Anganwadi, ki Self Help Group ban test ia ki tyllong um dih bad ban peit bniah ia ka jinglong jingman jong ka um.

Ha kajuh ka por, ha ka jingrakhe Jal Mahotsav kaba dang ïaid shakhmat ha ka Jylla Meghalaya (naduh 8 haduh 22 tarik Lber), la ai ruh ka jingithuh ïa ki lai tylli ki shnong na ka bynta ka jingtreikam ba tbit haba iadei bad ka jingtest iaka um ha u snem 2025–26, kata ka shnong Jongksha (Mawkynrew Block, East Khasi Hills), Khrang (Khatarshnong–Laitkroh Block, East Khasi Hills) and Nongkhlaw (Mairang Block, Eastern West Khasi Hills).

Ïa ki jingrakhe Jal Mahotsav ha Meghalaya la plie nongrim da u Lat ka Jylla u CH Vijayashankar ha ka 9 tarik Lber ha Lok Bhavan, kaba la rakhe ruh ïa ka sngi burom jong ki kynthei lane ka ‘International Women’s Day’.

Ki heh ophisar ki la ong ba kane ka jingai jingithuh ka pynpaw ia ka bynta ba kongsan ba la leh da ki shnong haki nongkyndong, ki nongialam shnong, bad ki nongtrei mon sngewbha ba la shah hikai ban pynthikna ia ka umbam umdih kaba bit ba biang bad kaba lah ban neh na ka bynta kawei pa kawei ka longiing, ka jingthmu ba kongsan jong ka Jal Jeevan Mission.