Kem dik kynsan ka trok kit tyndong lyer

Ki paidbah nongleit nongwan ki la lait thaw na ki jingjia ba sngewsih, hadien ba kawei ka trok kaba kit ia ki domestic cylinder ka la kem ding puk, hynrei na ka jingpoi sted ki bor pulit ka Byrnihat Police Station lem bad ki Pulit pynlip ding la lah ban tem noh ia ka ding kaba la klang bha bad ban iada pat na ka jingpur jong ka ding sha ki bynta ba la buh ia ki tyndong lyer ha kane ka kali.

La ioh jingtip, ba kane ka jingpluh ding kynsan jong kane ka trok kit tyndong lyer kaba don ia u number AS 01 SC 1518 kaba dang kiew sha Shillong ka la jia hajan ka khyrdop khrong khajna jong ka NHAI ha Pahammawlein kaba la jia ha ka miet jong ka 12 tarik Lber ha ka por 12:55 eiei mynmiet bad ka daw la antad ba ka lah ban dei namar ka jingshort circuit ha kane ka kali.

La ioh jingtip, ba u nongñiah jong kane ka trok tang mar ia iohi ia ka jingsdang kem ding jong kane ka kali u la mareh ban pan jingiarap na ki nongtrei ka NHAI kiba la pyntip marmar sha ki bor pulit ka Byrnihat Police Station bad ki bor pulit ka Fire and Emergency Services kiba la poi marmar ban tem noh ia ka jingklang jong ka ding kaba la bam duh ia ki bynta ba shakhmat jong katei ka trok.

Na ka liang ki bor pulit ka Byrnihat Police Station kin dang pynlong ia ka jingtohkit halor kane ka jingjia pluh ding kynsan jong katei ka trok kit tyndong lyer.