Ioh pdiang khusnam 3 tylli ki Shnong na ka President ba pyntreikam bha ia ka skhim JJM

Lai tylli ki shnong na West Khasi Hills District ka Nongsohpian, Tiehsaw Khyllem bad Umsaw Tyllang ki la ioh pdiang ia ka khusnam Jal Mahotsav Award 2026 na ka President ka Ri India ha nongbah Delhi halor ka jingpyntreikam bha ia ka Jal Jeevan Mission ha ki shnong jong ki.Ki nongmihkhmat na kine ki shnong ki la ioh pdiang ia ka khusnam ki kynthup ia u Sirian Wahlang, Sordar shnong Nongsohpian, ka Memorial Syiem, kaba dei ka Field Testing Kit (FTK) na Tiehsaw Khyllem bad u Aiakolos Riamri, Sordar shnong Umsaw Tyllang.Haba kren sha ki Nongthoh Khubor halor ka jingioh khusnam mynta ka sngi ha ophis u Executive Engineer, PHE Nongstoin Division ha ka jingïalang u Executive Engineer (EE) ka tnad Public Health Engineering, u Bah Teilang Kharrubon ryngkat bad u Junior Engineer Bah Royal Syiem lem bad kiwei ki ophisar ka tnad, u Executive Engineer ula pynpaw ka jingioh ia kane ka khusnam na ka President ka Ri India ka long ka jingsarong ba khraw ym tang ia kine ki shnong hynrei ia ka District hi baroh kawei.

Ula pynshai ia ki lad ki lynti ba ka tnad PHE ka la shim ban pyntreikam bha ia ka skhim Jal Jeevan Mission ha kine ki shnong bad ula kdew ruh halor ki jingeh ba mih ha ka por pyntreikam ia ka skhim bad kumno la lah ban pynbeit ia ki. Katkum ka jingong jong u, ka jingjop jong kine ki shnong kan long ka nuksa ia kiwei pat ki shnong ha ka district ban pyntreikam bha ia ka Jal Jeevan Mission.Ha ka jingiakren ha ki nongpathai khubor, u bah Sirian Wahlang, Sordar ka shnong Nongsohpian, ula pynpaw ba kane ka khusnam ka dei na ka jingiatreilang jong ki nongshong shnong bad ka tnad PHE ban pynthikna ba ka scheme kan long kaba jop. U la pynkynmaw ruh ia ki jingeh kiba ki paidbah ki la iakynduh mynshwa namar ka jingduna umbam umdih.

Katba u bah Aiakolos Riamri, Sordar shnong Umsaw Tyllang, u la batai ba ka Jal Jeevan Mission ka la wanrah ka jingkylla kaba khraw ha ka jingim jong ki nongshong shnong da kaba pynioh umdih ba khuid bad ba pura sha ki iing ki sem. U la pynpaw ruh ba ki paidbah nongshong shnong ki la shim bynta shitrhem ban pynlong ia kane ka scheme kaba jop. Ha kajuh ka por, ka Memorial Syiem ka FTK na Tiehsaw Khyllem, ka la phah ka khubor sha kiwei pat ki shnong ba ki dei ban iashim bynta bad iatreilang bad ki scheme ka sorkar khnang ban wanrah ia ka jingroi bad ban kyntiew ia ka jingim ha ki shnong nongkyndong. Ka la ong ka tnad PHE ka la ai shibun ki jinghikai ban pynsngewthuh halor ka rukom test ia ka um bad ki lad ïada ban pynthikna ka um ba pyndonkam ka long kaba khuid bad ba shngain ban dih.