Ïoh T.2 Klur ka Dr. H. Gordon Roberts Hospital lyngba ka Meghalaya Healthcare Policy

U Myntri Rangbah ka jylla u Conrad K. Sangma hynne ka sngi, ula pyllait iaka jingai jingiarap kaba T.2 Klur lyngba ka Meghalaya Healthcare Advancement Policy (MHAP) 2024, ia ka Dr. H. Gordon Roberts Hospital, Shillong ba kan lah ban pynurlong ia ka jingthmu ka jongka ban ai jingshakri ia ki paidbah kiba pang kiba shitom. Ka jingthmu jong kane ka jingai jingiarap da ka pisa lyngba ka MHAP, ka long ban weng iaka jingeh kaba mad da ki hospital kiba la pyniaid da ki mishoneri kiba la ai jingshakri la slem bha ia ki paidbah kiba don ha kylleng jong ka jylla. U Deputy Medical Superintendent u Dr. Kenneth R.L. Nongpiur haba kren ha ka jingialang ula batai bniah halor ka ki projek kiba la bei tyngka da ka MHAP kaba kynthup ia ka jingtei thymmai iaka Adult bad Paediatric ICU Complex, ka jingbuh ia ka Solar Energy Plant ban ioh ia ka bording, ban thied ia ki tiar ban ai jingiada iaka jingim bad ban thaw ia ka kynhun kaba pura kaban ai jingsuamr ia ki jingpang ki bapher bad kane ka projek, kaba la antad ba ka jinglut jingsep kan kot kumba T.2.95 Klur, kadei kaba la khmih lynti ban pyntreikam ha ki 4 tylli ki wat hapdeng jong ki 18–24 bnai, kaban kynthup ia ki jingtei, ka jingai jinghikai ia ki nongtrei bad ka jingwad bniah.

Ula pynpaw ba ka ICU Complex kan ai iaka jingsumar kaban kot bor ha kaba iadei bad ka jingai jingshakri ia ki khunlung kiba dang shu dep kha, ki khynnah bad ia ki kmie khamtam eh ia kito kiba wan na ki longing kiba duna ha ka ioh ka kot bad kiba na ka thain nongkyndong. Nalor kane u Bah K.W. Marbaniang, Administrative Officer ula ai ruh iaka dorkhas ha u Myntri Rangbah ka jylla, ban pan shuh shuh ia ka jingkyrshan, kaba kynthup ia ka jingbei tyngka naka bynta ban thied ia ki tiar Laser Lithotripsy na ka bynta ka jingsumar ia kiba don maw ha u khyllai, ban tei ia ka G+5 hospital kaba thymmai bad ban tei ia ka Academic Complex jongka College of Nursing. Ha kaba iadei bad kane ka dorkhas, u Myntri Rangbah ula pynthikna ia ki bor pyniaid jong ka hospital ba yn sa khmih bniah bad ka sorkar ka iengskhem ha kaban ai jingkyrshan ia ki hospital kiba la pyniaid da ki mishoneri kiba don ha kylleng jong ka jylla Meghalaya.

U Conrad Sangma ula pynpaw ia ka jingsngewnguh ia ka kam kaba la leh da ki jaka ai jingsumar jongki mishoneri bad pynpaw ba ka sorkar ka kular skhem ban pynkhlain ia ki jaka ai jingsumar kiba don ha kylleng ki bynta jong ka jylla. U Myntroi Rangbah ula ong, ka Meghalaya kumba long mynta kala pynlut ia palat 8.5% na ka mang tyngka ka jongka, ha kaba iadei bad ka koit ka khiah, kaba heh tam ha baroh ki jylla jong ka ri India bad kane ka jingbhah tyngka kala pynmih ia ka resol kaba bha, ha kaba kala lah ban pynduna da 45% ia ka jingkhlad noh jong ki kmie kiba punkhun, kaba dei ruh kaba la phaikhmat bha ha ka ri bad ha ka pyrthei baroh kawei.