Kurup biang ki pulit ka Assam ia ki mar ba shongdor 43 lak tyngka, kem ia kiba donkti na Khanapara, Shillong bad lap ia ka trok na Jowai

Da ka jingtrei shitom, ka kynhun jong ka EGPD na Basistha Police Station, ki bor pulit ki la ioh ban kurup noh ia ki tiar ki tar kiba shondor kumba 43 lak tyngka ia kaba la kynnoh ba la rongtuh ha ryngkat bad kawei ka trok kaba don ia u number AS 26 AC 0874 kaba la kit ia kine ki tiar na Guwahati sha Silchar ha ka 28 tarik Iaiong 2025. Na ka liang ki bor pulit, hadien ba la ioh pdiang ia ka jingujor halor ka jingshah rong tuh ia kitei ki tiar bad la suba donkti bad leh buittuh da u nongniah bad u nongbud jong katei ka trok, kumta marmar la pynlong ia ka jingtohkit bad ka jingthwet ia katei ka trok. Ka tyllong khubor ka ong ruh, ba hadien ba la iohlum ia ka jingtip kaba tikna, ha ka jingtohkit ki pulit ki la ioh ban kem ia ar ngut kiba suba donkti ha kane ka kam tuh kiba dei ruh kiba la bna nam ha kane ka kam tuh na kawei ka jaka ha ka thaiñ Khanapara.

Ia kine ki arngut la tip kyrteng kum u Ekram Hussain alias Imran (22) bad u Hafizur Miya (27) bad lyngba ka jingphla ka jong ki, ki pulit ki la khynra pat sa ha ka thaiñ Saradiya, Barpeta bad iohkem sa ia arngut ba kynthup ia u Babul Hoque (27) bad u Jiyarul Islam (29). Shuh shuh ruh, da ka jingtih bniah bha da ka kynhun ki pulit, lyngba ki kor teknoloji, la lah pat ban tip ia ka jaka ba la buhrieh ia ki tiar ki tar ba la kit ha katei ka trok bad ban kurup biang na Shillong, East Khasi Hills bad ban kem ruh ia  u wei u briew ba la kynnoh donkti ban shimti ia kine ki mar tuh ia u ba la tip kyrteng kum u Rakesh Kumar Mahato (33).

Ki pulit ka Basistha Police Station, ki la pyntip ruh, ba ki la ioh ban kurup ia ka trok kaba la pyndonkam ban rong tuh ia ki mar ia kaba la iehnoh ha ka toll gate ha Ialong, Jowai bad la ioh ban kurup biang ia ki tiar kiba la shah rong tuh. Halor kane ki pulit ki la register mukotduma bad ka jingtohkit ka dang iaid shakhmat.