Jop kput ka VPP na Nongstoiñ, HSPDP na Mawshynrut bad Independent na Rambrai-Jyrngam

U kyrtong ka VPP na Nongstoiñ District Council Constituency, Dr. Juristman Iawphniaw, u la jop ia ka 27-Nongstoiñ constituency da kaba pynliem ia u kyrtong ka NPP, u bah Dressar Marngar, da 8718 vote. U Dr. Juristman Iawphniaw u la ioh 16,928 vote, katba u Dressar Marngar u la ioh 8,210 vote. U Dr. Juristman Iawphniaw u la pynpaw ka jingsngewnguh ia u Blei uba la pynlah ia u ban poi shaduh kane ka thong bad u la ong ba ka jingjop jongu ia kane ka election ka dei na ka bynta u duk u suk bad ym na ka bynta kito kiba ieit sbai.

Ha 29-Mawshynrut Constituency, u Bah Srally Rashir na ka HSPDP u la jop ia kane ka seat da kaba pynliem ia u kyrtong ka NPP, u Bah  Gardinal Sohshang da 3229 vote.U kyrtong ka HSPDP, Srally Rashir u la ioh 14,067 vote, katba u kyrtong ka NPP, u Gardinal Sohshang ula ioh 10,838 vote. U Bah Srally Rashir ula ai khublei ia ki paidbah ka Mawshynrut Constituency bad ula pynpaw ruh ba kumba la buh ha ka Manifesto jong ka Party, un iai trei bad buddien ia kine ki mat na ka bynta ka jingmyntoi jong ki paidbah.

Ha 28 – Rambrai-Jyrngam Constituency, u kyrtong Independent, u bah Lurshai Kharbani ula jop ia kane ka seat da kaba pynliem ia u kyrtong ka NPP, u Bah Kimfa Sydney Marbaniang da 2154 vote. U Lurshai Kharbani ula ioh 9,992 vote, katba u Kimfa Sydney Marbaniang ula ioh 7,838 vote. U kyrtong Independent na Rambrai-Jyrngam u la pynthikna ban pyniasoh bad ka VPP bad ka shong sa ha ka VPP la ka donkam ne em ia u ban ai jingkyrshan.