Julor palat 1 hajar tylli ki iing na ka jingkhie kynsan ka ‘Eriong ha Ri-Bhoi

Ha ka jingjia khie kynsan ka eriong ha ryngkat u slap bajur kaba la jia ha ka 16 tarik Lber da ki spah tylli ki Shnong ki la shah ktah jur ha Ri Bhoi District, ha kaba la ioh ia ka kaiphod ba palat 1028 tylli ki iing ki sem ki la julor ha ryngkat ka jingjulor jong ki mar rep, ki soh ki pai bad ka jingthut ka bording 132 KV ha Umiam, Byrnihat bad ka 33 KV ha Nongpoh.
Na ka liang u Deputy Commisioner ka Ri Bhoi District, u Abhilash Baranwal u la iathuh, ba ka jingshah pynjulor jong ki iing ki sem bad kiwei kiwei ka la jia ha baroh san tylli ki C&RD Block kynthup ia ka Umling, Jirang, Umsning, Mawhati bad Bhoirymbong Block, ha kaba ka kaiphod ba la iohlum ka jingjulor ka la jia ha palat 147 tylli ki Shnong bad palat 1028 tylli ki longing ki la shah ktah watla kam shem la don kano kano ka jingjia ba sngewsih ha kane ka jingkhie eriong lait noh tang ki jingjulor kiba ki jur.
U la iathuh ruh, ba katkum ka kaiphod la iathuh, ba ka Jirang bad Umling Block ka la kham shah ktah ha kane ka jingkhie ka eriong bad haba kheiñ kyllum haduh 5000 ngut ki riew paidbah ki la shah ktah jur nalor ka jingjulor jong ki mar rep ki soh ki pai, ka jingthut ha ka jingsam bording namar ka jingsniew ki power line ba 132 KV ha Umiam bad Byrnihat kumjuh ka 33 KV ha Nongpoh, na ka liang ka ophis u DC ka la bthah ia ka Tnad sam bording ban pynsted ia ka jingmaramot khnang ba ka jingsam bording kan nym don jingdkoh.
Shuh shuh ruh, u la pyntip ba la bthah ia baroh ki Block Development Officers ban leit jngoh ia kito ki longing kiba la shah ktah ha kane ka jingkhie ka eriong bad la sam ruh ia ki lad jingiarap ba kyrkieh kum u khaw, Jain syaid, ki tarpal bad kiwei kiwei ki jingiarap bad yn nang bteng ban sam ia ki lad jingiarap sha baroh kito kiba la shah ktah.