Jurip ka RBYF ia ka ophis DTO, ba jot rathai ka jaka leit shabar

Hadien ka jingiohlum jingujor na ki paidbah ba bun, halor ka jinglong jingman jong ka kyrpong ka ophis treikam u District Transport Officer, na ka liang ki nongialam ka Ri Bhoi Youth Federation (RBYF), ki la pynpaw ia ka jingsngewkhia bad ruh ban dawa na ki bor kane ka tnat ban maramot ia ki bynta ba kongsan jong ka building treikam u DTO, Nongpoh.

Ha kane ka jingleit jurip ka RBYF, Lai Shnong Unit, ia ka kyrpong iing building ka ophis u DTO, la lap shisha ba ki paidbah ki la ujor ha kaba ia dei bad ka jingjot jingpei ki jaka leit shabar, ka jingsatah ki rong ki rup jong katei ka building nalor ka jingmih ruh ka jingsma iwtung kaba shyrkhei na katei ka jaka leit shabar kaba la ktah shikatdei ia ki paidbah ba leit donkam ha katei ka ophis lem bad ki nongshong dukan ha katei ka jaka.

Haba kren bad ki Nongthoh Khubor, u samla Donbok Lyngdoh, President ha ka jingiadonlang ruh u Samla Wickham Marweiñ, Secretary, ki la pynpaw ia ka jingsngewkhia kaba jur ban lap ia ka jinglong jingman ha katei ka ophis building ba shong treikam u DTO, ha kaba bun na ki bynta jong kane ka building ki la long kiba liprong, ka jingjot jingpei bad ka jingjaboh kaba shyrkhei na ka jaka leit shabar.

Ki la pynpaw ruh, ba ha kane ka jingjurip ia kane ka ophis DTO kaba la plie naduh u snem 1996, la shu ieh khongreng khlem maramot shuh bad kane ka la pynsniew dur shaba palat ia katei ka building, ha kaba bun tylli ki bynta kiba la pait la pra lut bad shu ieh shrah khlem don nongpeit ne nong maramot.

Halor kane, na ka liang ka seng ka la dawa na ki ophisar ka tnat DTO, ba kin phaikhmat mardor ban pynbit pynbiang ia katei ka building khnang ba kan long kaba itynad bad kaba phuh ba phieng khnang ba ki paidbah nongleit nongwan donkam ha kane ka ophis kin nym ia kano kano ka jingeh khamtam ia ka jingdonkam ia ka jaka leit shabar kaba tikna.