U Biren Singh u dei ban panmab halor ka jingkynthoh ia u PA Sangma: Marcuise

U Working President ka National People’s Party (NPP) In-Charge ka Rilum Garo Hills u Marcuise N Marak ula dawa ia u Myntri Rangbah barim ka Jylla Manipur u N Biren Singh ban panmab halor ka jingkynnoh ba u PA Sangma (Bam Kwai Dwar u Blei) ba u kwah ban phiah ia ki Jylla hapoh ka thain Shathei Lammihngi (North East).

Haba pynrem ia ka jingkynthoh u N Biren Singh ia u PA Sangma (Bam Kwai Dwar u Blei), u Marcuise N Marak uba dei ruh u Myntri Sorkar ula ong, “U N Biren Singh u dei ruh u Myntri Rangbah barim ula thaw ia ki jingkulmar hapoh ka Jylla Manipur bad baroh ki tip ia kata hynrei mynta u tan kylla ia ka kyrteng jong u PA Sangma watla um don shuh bad ngi ha kane ka sla pyrthei”.

“Kane ka long kaei kaei ka bym lah ban pdiang bad ngi pynrem jur ia kane ka jingkynnoh bad ngi dawa ba u N Biren Singh u dei ban panmab mardor” ula bynrap.

U Marcuise ula ong, ba u PA Sangma (Bam Kwai Dwar u Blei) u dei u nongialam ba janai bad u nongialam ba trei na ka bynta ka bha ka miat ki paidbah khamtam ka thain Shathei Lammihngi (North East).

Ula ong ba u PA Sangma (Bam Kwai Dwar u Blei) u don ka nongrim ba skhem kata ban pyniatylli ia ki paidbah, ym ban pyniapait kumba la kynnoh da u N Biren Singh.

“Namar kata nga pynrem jur ia ka jingkren u N Biren Singh bad na ka liang ka NPP Garo Hills nga dawa ba u dei ban panmab mardor,” ula ong.