Jurip U Mayralborn Ïaka Jingshna U Surok Umden | 25% Ka Jingsiang Rong | Bun Ba La Dep 100%

Kumba la sakhi ba ka jingpyntrei ïa u surok Nongpoh, Umden, Sonapur Road uba don ka jing jrong 58 kilometre ka la nang iai shait shait bad khamtam hakaba ia dei bad u Surok Naduh Ïewmawlong Sha Umden uba don ka jingjrong 21 Kilometres, naka liang u Bah Mayralborn Syiem MLA ka Nongpoh ha ryngkat ki ophisar na ka Tnad PWD mynta ka sngi u la shimkhia ban leit jurip ïa shilynter jong utei u surok uba la sdang ban siang rong naduh na Lad Iewmawlong haduh ha ka Shnong Marngar. Haba Kren sha ki lad pathai khubor hadien katei ka jing jurip, U MLA ka Nongpoh Bah Mayralborn Syiem u la Pynpaw ba u dap daka jingkmen ban iohi ba ki kam ki la nang iaid sted bha bad u la pynpaw ruh ba u sngewhun ban iohi ïaki kam kiba la trei katkum ka jingdawa jong une u Surok.

U Bah Mayralborn u la iathuh, ba ka jingshna ia une u Surok uba 21 Kilometres Na Nongpoh Sha Umden ki kam ki la bun ba la jan dep hakaba ka jingtih iaki kyndew bad ka jing pynbiang iaki Home Pipe ki la dep 100 percent, Ka jingsiang ïa u maw ka la dep 75 percent bad ka jingsiang ïaka rong la dep 25 percent, u la ong ruh, haba ioh ban wan jurip ha kane ka sngi ka pyni hun ia u kum u Nongmihkhmat haba iohi iaki rukom trei iaki kam. Shuh shuh u la ïathuh, ka jingpyntrei ïa u Surok, Na Umden kaba pynmih sha Byrnihat ïa kane ka kam ka la nang iaid shait shait hakaba ïa une u Surok ruh shen yn sa lah ban pyndep noh ha kapor kaba biang.

U Bah Mayralborn Syiem u la Pynpaw ruh ka jingsngewnguh ïa ka tnad PWD, Road bad ïa u Symbud Myntri Rangbah ka jylla u Bah Prestone Tynsong ba dei lyngba ka jingshimkhia bad ka jingpynsngap jong u iaki jingdonkam kaba la lah ban pynurlong shisha ia une u Surok uba ki paidbah ki la da angnud shisha ban ioh naduh mynshwa.