Jurip u MLA ia ka jingtei Umsawnongbri PHC ban ai jingshakri khambha ia ki paidbah

U MLA ka Nongpoh u bah Mayralborn Syiem, haka jingsynran lang ki Ophisar naka tnad ka koit ka khiah lem bad ki nongialam Shnong mynta ka sngi u la leit ban jurip ïaka jingtei ïaka Umsaw Nongbri Primary Health Centre (PHC) kaba don haka Shnong Umsaw Nongbri.Katei ka jingleit ban jurip ïa katei ka PHC ka long ban tip ba haduh katno ka kam ka la dep bad ha kajuh kapor ban bthah ban nang pyndep kloi iaki kam kiba dang sah khnang ba yn ioh ban pyntreikam noh ia katei ka jaka ai jingsumar ba kan long ka jingmyntoi naka bynta ki paidbah.

Haba kren sha ki lad pathai khubor, u Bah Mayralborn Syiem u la Pynpaw jaka jingsngew hun ban iohi ba ka kam ka la dep bad 85 percent ka jingtei ia ka PHC ka la dep bad sa tang katto katne bnai yn sa ioh ban plie noh ïa kane ka jaka ai jingsumar.Shuh shuh u la Pynpaw, ba ka jingtei ia kane ka PHC ka la jan dep bad ha shwa ba ngin ioh plie ia kane ka PHC ngi donkam ban don ki nongtrei kiba tikna naduh ki Doctor, Ki Nus bad kiwei kiwei ki staff hakaba naka liang jong u kum u Nongmihkhmat u kyrpad iaka sorkar ba kan pynlait noh ïaki post ha kaba iadei bad katei ka PHC khnang ba yn lah ban pyntreikam noh kham kloi ia ka.

Ha kane ka sngi Jurip, la ïa donlang ruh da ka Dr. B Lyngdoh Jt. Director MI, Dr. NM Sangma DM&HO Ri bhoi, Bah RA Wanniang EE, bah BS Syiem Païem Raid Nongbri lem bad ki Rangbah Shnong naka Shnong Umsaw Nongbri bad Shnong Kbet Nongbri.Ha kane ka sngi u MLA ha ryngkat bad ki Ophisar naka tnad PWD Road u la leit ruh ban ïuh kjat haka Shnong Kbet Nongbri ban ai jingiarap sha ka Shnong bad sha ka Balang Presbyterian naka bynta ba kin nang pynkhreh pdiang ïaka jingiaseng Synod Samla ka ban sa long haka Shnong Kbet Nongbri ha u snem u ban sa wan.Na ka liang u MLA ha katei ka sngi, u la ai ïoh ban aiti iaka work order kaba 3 lakh tyngka naka bynta ban tei ïaka kynroh iingmane bad 1 lakh tyngka naka bynta ka Kynhun CE Society jong ka Balang Presbyterian Kbet Nongbri ba kin ioh pynbiang iaka Uniform jong ka kynhun Choir bad ha kajuh kapor u la leit ruh ban jurip ïa u surong ban shiang rong uba 1km. bad ïaka jingthoh madan ka jaka ban ioh pynlong ia katei ka Synod Samla.