Ka Assam Rifles ka wanrah ia ki tiar iakhun katkum ka juk mynta

Ka Assam Rifles, kawei na ki kynhun shipai ba la rim tam bad ba pawnam ha India, ka la rakhe ïa ka Raising Day ba 191 ha ka 24 tarik Lber 2026 da ka jingsngew sarong bad ka burom ba khraw ha ka headquarter jong ka ha Shillong. Kane ka mawjam kaba kongsan ka pyni ba la jan arspah snem jong ka jingshakri kaba aiti lut, ka jingshlur, bad ka jingkut jingmut kaba khlem artatien ban iada ia ki pud ki sam jong ka ri.

Ha kane ka sngi, u Lieutenant General VikasLakhera, AVSM, SM, Director General jong ka Assam Rifles, ryngkat bad baroh ki kyrdan jong ka Kynhun Shipai, ki la ai burom ha ka War Memorial ha Shillong ia ki riew shlur kiba la aiti ia lade ha ka kam. Haba ai jingkren sha ki shipai, u Director General u la ai ka jingiaroh ia baroh ki kyrdan kiba la noh synniang ha ki kam ialeh pyrshah ia ki lehnoh ha ka thain shatei lammihngi bad ha Jammu & Kashmir.

Ka Kynhun Shipai ka la bteng ban pyni ia ka jingtbit ha ka jingtreikam kaba kyrpang ha u snem 2025–26. Kum ka jingithuh ïa ka jingtrei jong ki, lai tylli ki battalion jong ka Assam Rifles ki la ioh ia ka khusnam Chief of Army Staff Unit Citation, katba saw tylli ki Battalion ki la ïohïa ka khusnam General Officer Commanding-in-Chief Unit Citation. Kaba kham kongsan ka long ba ia ka 8 Assam Rifles la pynkup burom da ka nam ‘Bravest of the Brave’ ha ka Army Day 2026.

Shuh shuh hadien ki jingjop ba bun, la pynkup burom ia ki shipai jong ka Assam Rifles da ki katto katne ki khusnam riewshlur bad ka jingshakri ha ka Republic Day 2026, ba kynthup ïa kawei ka Kirti Chakra, saw tylli ki Shaurya Chakra, kawei ka takma Vishisht Seva bad khatar tylli ki takma Sena.

Ka Assam Rifles ka dang iaineh ha ka jingkut jingmut jong ka ban pynkylla thymmai lyngba ka jingwanrah ia ki tiar ialeh katkum ka juk mynta, ki rukom peitngor, bad ki tiar iada. Da kaba bteng ban pynleit jingmut ha kaba kyntiew ïa ka bor treikam, ka Kynhun Shipai ka ieng kum u rishot jong ka jingshngaiñ bad ka shongsuk shongsaiñ ha ka thaiñ Shatei Lammihngi.

Katba ka thain ka nang kiew sha ka roi ka par bad jingseisoh kaba kham khraw, ka Assam Rifles ka dangiai bteng ban kyntiew ia ka jingshaniah bad jingshngain hapdeng ki nongshong shnong jong ka thain. Da kaba pynneh ia ka thong jong ka kum ki ‘Nongiada jong ka thain shateilammihngi,’ ka Kynhun Shipai ka long kaba la pynkhreh ban ialeh pyrshah ia ki jingeh kiba dang mih da ka jingskhem bad ka jingaitilut.