Ka don jingduna ia ki PLG Commercial, hynrei ka dang biang ha jylla: Methodius Dkhar

U Myntri ka tnat Food Civil Supplies and Consumer Affairs u Bah Methodius Dkhar hynne ka sngi u la ong, ba ka jingdon ka lyer shet (domestic LPG) ha ka jylla ka dang biang. U Bah Methodious ula pyntip ka la don ka jingduna ha kaba iadei bad ka jingioh (Supply) Commercial LPG ne ki tyndong lyer shet ba pyndonkam ha ki jaka kamai. Haba kren shaki lad pathai khubor u Bah Methodious ula ong “Kumba long haduh mynta hi ngi lah ban ong ba ka dang biang, hynrei ngim dei pat ban leh pahuh”.

Haba pynshai halor ka jingud jong ki paidbah haba iadei bad ki tyndong lyer shet (Domestic LPG), u Myntri u la pynshai ba ki jingujor kaba mih ka dei namar ka jingdon ki kyndon ba thymmai ha ka rukom Apply bad kam dei satia kaba iadei bad ka jingduna ka LPG.”Nga kwah ban pynshai ba kam don satia ka jingduna ha ka jingsuplai ia ka domestic LPG hynrei ka daw ka dei namar ba don ka kyndon kaba iadei bad ka rukom sam ia ki” ula ong. Ula iathuh ba ka jingbuh por man la ka 25 sngi ia ki nongpyndonkam LPG ban Apply kadei kawei na ki daw ba ki paidbah ki kynduh bad ula bynrap ba ki paidbah kiba pyndonkam tyndong lyer shet kin ym lah ban pan (book) biang sa kawei ka tyndong lyer shet hapoh ki 25 sngi. 

Nalor kane u Myntri u kyntu ia ki paidbah ba ki dei ban pyniasoh ia ki mobile number jong ki bad ka system kaba dei bad ki jaka sam tyndong lyer shet khnang ba kan ym buh jingeh ia ki ban ioh ia ki DSC number.