Ka Elaka Saitsohpen ka jabieng jong ka Sohra, hadien 45 snem ai ka sorkar 128 akar ka jaka

Ka jingiakhun jong ka Elaka Saitsohpen Sirdarship, Sohra kaba la 45 snem mynta ka lah urlong, haba ka Sorkar Jylla ka la iasoi ia ka jingiatehkular bad aiti ia ka jaka kaba 128 Akar ban khmih noh da ka Elaka Saitsohpen. Kane ka jingiatehkular ka la long hynne ka sngi ha Madan Pynshadkhurai, Saitsohpen, Sohra ha kaba u Commissioner and Secretary ka sorkar Jylla u Bah Cyril V Diengdoh bad u Sirdar ka Elaka Saitsohpen u Bah Dawning Kynta ki la iasoi ia kane ka jingiatehkular, ia kaba la wan ban donlang u Symbud Myntri Rangbah ka Jylla u Bah Prestone Tynsong, u Myntri ka tnad GAD u Bah Sosthenes Sohtun, ki MLA kiba kynthup ia u Bah Balajiedkupar Synrem bad u Bah Gavin Mylliem, ki MDC kiba kynthup ia u Bah Titosstar Well Chyne, Kong Grace Mary Kharpuri bad u Bah Barikupar Synrem, ki heh ophisar sorkar, ki paitbah ka thain bad kiwei kiwei. U Bah Prestone haba kren ha ka jingialang ula ong, ba ka sorkar kala aiti beit ia kane ka jaka kaba 128 Akar sha ka Elaka Saitsohpen ban pyniaid ia kane ka jaka ha ka jingstad ka jongka bad ka jingai ka sorkar ia kane ka jaka ka long ruh kum ka jingai sngewbha Khristmas bad Snem Thymmai ia ki paidbah nongshong shnong.

Ula ong, ba ka Elaka Saitsohpen ka dei ka jabieng jong ka Sohra Civil Sub Division bad kumta lada ki ialam ia ki shnong da ka lynti kaba bakla kin poi sha khlaw bad ula kyntu ia ki nongialam ba kidei ban ialam sha ka jaka kaban long kum ka paradis. U Bah Prestone ula iathuh ruh ba ka sorkar kala pyniaid shakhmat ban pynkhreh ia ka DPR ban shna pynheh noh ia ka surok khnang ba kan long shuh shuh ka jingkyrkhu ia ka thain Sohra bad Saitsohpen bad kumjuh ia ka thain Shella. Ula pynpaw ba ka sorkar MDA kala lah ban leh ia kiba bun ki kam bad kala lah ruh ban pynurlong ia ki projek ha ka jylla kiba la sahteng la bun phew snem bad ula kubur ruh ba ki dang don sa ki katto katne ki kam kiba dang sahteng bad ka sorkar ka dang shimkhia ban pynurlong noh ia ki. U Bah Prestone ula ong, ba ka sorkar ka don ia ka jingsahnud haduh mynta ba kam pat lah ban pynkynriah ia kiba sah ha them metor bad halor kane ka mat bun kila kynthoh jur ia u, hynrei ula pynthikna ha ka jingialang ba ka por kan sa poi ba yn sa lah ban pynurlong noh ia kane ka jingangnud bad jingdawa ki paidbah.

U Sirdar ka Elaka Saitsohpen u Bah Dawning Kynta ula iathuh ba ka Elaka kala iakhun ban ioh ia katei ka jak ana ka sorkar namar ha ki por kiba mynshwa katei ka jaka kadei kaba hap hapoh ka jingsynshar ki phareng bad ula ong ba kane ka kam kala urlong mynta hadien 45 snem bad kumta kane ka sngi ba iatehkular kadei ka sngi kaba sah jingkynmaw. Ula ai ka jingiaroh ia u Myntri Rangbah ka jylla u Conrad K Sangma, u Symbud Myntri Rangbah ka jylal u Bah Prestone Tynsong bad ia kiwei kiwei ki nongmihkhmat kiba la shimkhia ha kaban lah ban pynurlong ia kane ka jingangnud jong ki paitbah. Ula iathuh ba ki paidbah baroh shi katta kila mad ia ka jingeh haba ki leit shim ram na ka Bank namar ba kim lah ban pynshisha ne ban buh bynda ia ki jaka ki jongki namar ba kim dei satia kiba la longtrai ia katei ka jaka.    Ki nongkren ha ka jingialang kila pynpaw iaka jingsngewnguh ia ka sorkar jylla kaba la shimkhia ban pynbeit ia kane ka kam bad mynta khatduh khatwai la lah ban pynurlong ia ka jingthmu bad poi syndon sha ka jingiateh kular ha kaba ka sorkar kala aiti syndon ia ka jaka kaba 128 Akar sha ka Elaka Saitsohpen.Ki la ong ruh ba kane ka jingioh ka Elaka ia kane ka jaka kala long ruh kum ka jingioh ia ka jinglaitluid namar baroh shi katta katei ka jaka ka dei kaba la longtrai da ka tnad GAD.