Ka ELECRAMA 2025 ka pyni ia ka jingkiew ha ka jingshalan ia ki tiar bording shabar ri

Ka ELECRAMA 2025 ka iai bteng ban long kum kawei na ki shlem ba khraw bor ban saindur ia ka lawei jong ka jingpynmih bording ka India bad ha ki kam kiba iadei bad ka bording, da kaba wanrah ia ki jingia phylliew jingmut kiba paka, ban don ia ki kyndon treikam, bad ka jingiatreilang jong ki karkhana ka long ka bynta kaba hapdeng jong kine kiei kiei baroh. 

Ia ka lympung jingialang jong ka CEO Roundtable, ba la pynlong ha ka sngi ba nyngkong, ka la long ka nuksa kaba bha da ka jingiashim bynta jong palat 120 ngut ki heh nongialam na ki karkhana bapher bapher, ki nongshan ain, ki riew shemphang na kylleng ki ri ka pyrthei, kiba la iakren halor ki mat kiba kongsan bha kum ka jingkylla ha ka jingpynmih bording, ka jingwanrah ia ka rukom treikam katkum ka juk mynta ha kaba iadei bad ka jingthew ia ka jingiaid ne ban sam bording, ka jingpynmih ia ki kali ki bym pynmih shuh ia ka lyer jaboh, bad ka rukom bad kyndon treikam kaba la pyniaid da ka bor treikam ki AI. Ha kane ka jingiakren la pynpaw shaphang ka jingkut jingmut jong ka India ban nang pynkhlain shuh shuh ia ki karkhana kiba iadei bad ka kam bording, bad wanrah ia ki buit bad ki jingstad treikam thymmai, bad ban pynurlong ia ka net-zero lyngba ka jingiatreilang jong ki karkhana bad ka sorkar. Haba ban shuh shuh halor kane, ha ka sngi kaba ar jong ka ELECRAMA 2025 la sakhi I aka jingiadonlang jong U Pankaj Agarwal, Secretary, ka tnad ki kam bording ne Power, bad U Gurdeep Singh, CMD, NTPC, kiba la nang ban shuh shuh ia ka jingkut jingmut jong ka sorkar ban pynsted ia ka jingwanrah jingkylla ha ka liang ki kam bording. 

U Pankaj Agarwal, Secretary, ka tnad ki kam bording ne Power, ka sorkar India u la iashim bynta ha ka jingiakren jong ki heh ki hain ha ka ELECRAMA 2025, kaba kynthup ia ka jingiashim bynta jong u ha ka CEO Roundtable, ha kaba u la iasam ia ki jingtip ba bniah shaphang ka jingkhmih lynti jong ka sorkar ban don ia ka jingtreikam kaba skhem, kaba iaid katkum ki bor teknology, bad kaba iaineh. Haba kren shaphang ka jingkiewsted jong ka India ha ka liang ki kam bording, u la ong, “Ka India ka don ha ka lynti ban long kum kawei na ki ri kaba khlain bha ka jingshalan ia ki tiar kiban pyndonkam ha ka liang ki kam bording, ha kaba kiwei na ki shlem treikam ki ri ka pyrthei ki la pyni ia ka jingsngewmon ia ka rukom lah jong ka India ban shna ne pynmih tiar. Ka sorkar ka la long kaba la aiti lut ban kyrshan ia ki karkhana- la ka long ha ki kyndon treikam, ka jingpynioh ia ki mar ki mata, ne ia ki jingtei na ka bynta ban leh ia ka jingpyrshang ne ban test. Ki rynsan kum ka ELECRAMA 2025 ka long kaba biang bha na ka bynta ki nongialam ha ki karkhana bapher bapher ban pyniahap bad ka thong jong ka ri bad ban wanrah ia buit stad thymmai ha kaba iadei bad ki kam bording bad ka jingpynmih bording.”