Ka JHADC ka ïing ki Jaminder ba bun jaka puta: J.Pohtam haba iatai ia ka CAG

Ha ka kynta iatai halor ka CAG jong u snem 2017-18 bad 2018-19 ba la wanrah da u CEM ka JHADC u Thombor Shiwat hynne sngi hapoh ka dorbar lyiur ka JHADC u MDC ka War Central u Jamshaphrang Pohtam haba shim bynta ban iatai halor ka bynta jingduhnong ka council u ong, to ieng ban pyntikna ban lait naka jingduhnong khnang ba haka CAG report ban sa wan ngin ym kdew shuh iaka jingduhnong.

U ong ka Rilum Jaiñtia dei kaba riewspah hynrei sngewsih pat ba ka District Council ka ka long kum ka ïing ki Jaminder kiba don iaki jaka puta ki jaka rep hynrei naka daw ba ki khun ki kti kata ka ïing ki long jaituh ban treikam ka kylla duk noh, ka khajna ba ki dei ban ioh ruh ym don ba lum, ba kin rep kin riang dalade ruh kim treh.

Kumta ka jingtreikam ka council ruh ka long kumjuh hi.

U kyntu ruh ia ka sorkar ba kumba ka long shlur ban leit sam check ha man ki jaka da kaba shim daka ram naka bynta ban wanrah shibun ka roi ka par, longshlur ruh ban pyllait iaka pisa bhah ka council khnang ban ym iap thngan ki khun ka council.

Ula ai jingmut ruh ba dei ban pynduh pyndam noh iaki committee bym don jingmut namar ki dei tang ban pynlut san iaka spah ka hajar jongka council.

U ong ka CAG ka kdew ba don 10 tylli ki committee baka council ka hap ban siew ia kiba bunjait nalor ka tulob ba ki ioh. Kumta u kyntu ban pynduh pyndam noh ia kum kine ki committee bym phoida ei ei hynrei ki long tang kum ki thliem kjit snam iaka spah ka hajar jong ka council.

Kiwei pat ba shim bynta ban iatai ia kane ka CAG kynthup u Andrew Shullai, u Rikut Pareiñ bad Nehimaia Lamare.