Ka jingiapher ki ktien kam dei ban wanrah ka jingiapait ha ka sain pyrthei

Ka jingïalang ba ar sngi halor ka Bharatiya Bhasha Pariwar la pynlong da ka English and Foreign Languages University (EFLU), Regional Campus, Shillong bad ka Bharatiya Bhasha Samiti, Ministry Education ka Sorkar India, New Delhi ha ka 29 bad 30 tarik u Kyllalyngkot 2026 ha regional Campus Shillong.

Ka Prof. Mousumi Guha Banerjee, Director ka EFL University, Regional Campus, Shillong ka pdiang sngewbha ia ki riew rangbah bad ki nongiashim bynta bad pynpaw ka jingsngewnguh ia ka Bharatiya Bhasha Samiti, ka tnad pule ka sorkar India kaba iatreilang ban pynlong ia kane ka prokram. Ka la pynpaw ruh ïa ka jingkular ha ki rukom hikai bad wad bniah ia kiba thymmai ha ki jingpule bapher ban pynleit jingmut ha ki jaitbynriew, ki kolshor, ki jinglong, bad ki rukom im ka thaiñ Shatei Lam Mihngi ka Ri India. Ka la kdew ka jingialang kan pynkhlain shuh shuh ban sngewthuh hapdeng ki ktien ka jingthmu ba hakhmat ka Campus.

Haba ai jingkren kum u kongsan u Chairman ka Bharatiya Bhasha Samiti, ka tnad pule ka sorkar India, u Padma Shri Chamu Krishna Shastry, u la sot ia ka jingkren u Myntri Rangbahduh ka ri, u Narendra Modi ha kaba ula ong, “Baroh ki jait ktien kmie ka ri India ki dei ki ktien ka ri. U la ban jur wat la ka ri India ka don haduh 1,369 tylli ki ktien, katkum ka khanasumari u snem 2011 bad ia kine ki ktien la pynbynta ha ki rukom bapher, hynrei ka jingiapher ki ktien kim dei ban wanrah ka jingiapait iapra ha ka sain pyrthei bad ka dei ban long kum ka lad ban pyniatylli.

U la ong ka jingbun ki ktien jong ka ri India ka pynpaw ïa ka jingmut jong ka Bhashayein Anek, Bhav Ek-bun ki ktien, kawei ka jingsngew bad jingïadei kaba ïasam lang. Katba ka jingpher ktien ka long ka jingitynnad jong ka ri, ka bor bashisha ka shong ha ka jingiatylli; khlem ka jingiatylli ka jingpher kam lah ban skhem.

U la kynthoh ka ri India ka don kawei ka kolshor ba iadei bad kiba bun ki jingpynpaw, ym ki kolshor kiba kyrpang. Ka jingpher ha ki ktien kam mut ka jingpher ha ki briew ne ki kolshor, ha ka jaka kata ki pynlong kawei ka Bhasha Parivar (ka jait ktien).

U kdew ki jingialeh pyrshah ha ka ktien la pynmih ha ka por synshar ki phareng lyngba ka sain pyrthei. Namar kata, u khot ia ka jingpyniasohlang ia baroh ki ktien ha kawei ka longiing kaba iatylli ban kyntiew ia ka jingiatreilang ban wanrah ka jingiatylli ka jaitbynriew bad ri baroh kawei.

Ha kane ka sngi la ioh ruh ka jingkren na u Dr. BDR Tiwari, (IAS) Commissioner bad Secretary jong ka ka tnad ilekshon ka jylla, u Prof. Nani Gopal Mahanta, Vice Chancellor Gauhati University, Assam. Bad kiwei ki riew pawkhmat.