Ka jingkhang ia ki Haat khappud ka ktah ia ka kamai ki paidbah ha khappud India-Bangla

U MLA ka Mawsynram constituency u Bah Olan Suin hynne ka sngi ula ong, ba ka jingkhang khyrdep ïa ki ïew khappud lane ki border haat ka la ktah haduh katta katta ïa ka kamai kajih ki briew ha ki shnong khappud ka India-Bangladesh.

U MLA ula pynpaw ruh ki paidbah ka thaiñ thaiñ Mawsynram, East Khasi Hills kidei kiba shah ktah jur bha namar ki don 2 tylli ki Border Haat kata ka Lalpani bad Ryngku border haat.

Haba kren bad ki lad pathai khubor, u Bah Olan u la ong ba ka jingkhang ia kitei ki iew khappud kadei tang namar ka jingbym shong suk shongsain bad ka jingkhihwin kaba don ha hapoh ka Ri Bangladesh kaba dei ka ri kaba don mar syndah bad ka thain.

“Kine ki border haat ki la khang khyrdep mynta la shisnem ei ei namar ka jingkhihwin ha Bangladesh. Hynrei mynta ba ka Sorkar ba thymmai ka la wan ha Bangladesh ngi khmih lynti ba shen yn sa lah ban plie noh namar ka shongsuk shongsain ka la wanphai biang” u la ong.

U Bah Olan ula ïathuh ba naduh ba khang noh ia kine ki iew, ki paidbah ha khappud kiba ju thied bad die ha kine ki iew ki la hap ban sangeh syndon namarba ym lah shuh ban ïathied ïadie.

“Namarkata ka la ktah haduh katta katta ïa ka jingim jong ki paidbah kiba shong ba sah ha ki shnong khappud namarba ka iew ka la khang khyrdep haduh mynta,” ula ong.

U la bynrap ba katto katne ki briew kiba ju shaniah ïa ka kamai kajih na ki iew khapud mynta kim banse ban wad da kiwei pat ki lad ki lynti tang ban im kamai jakpoh. “Hynrei nga kyrmen ba shen yn lah ban plie noh iaki Border haat namar la wan daka Sorkar thymmai ha Bangladesh” ula ong.