Ka jingkieng Sonapur bad Umpasu ki la synjor bad don ha ka jingma: JSU

Ka JSU-Narpuh Circle hynne ka sngi ka la leit ai da ka jingthoh ha u Deputy Commissioner (DC) ka East Jaintia Hills District ban pynsngew halor ka jinglong synjor bad ka jingjot jong ki ar tylli ki jingkieng kiba la buh ia ka leit ka wan jong ki paidbah ha ka jingma. Ki nongialam ka JSU Narpuh Circle kila pynapw ba ki ar tylli ki jingkieng kiba la jot la pra ki kynthup ia ka jingkieng ha Sonapur (Sonapyrdi) Wah Lukha Bridge bad Jingkieng Umpasu bad kine ki jingkieng mynta kila sdang ban jot, pra bad khamtam haba ka jingkieng Wah Lukha kala sdang ban don ha ka jingma kaba khraw bha ba ka lah ban kdiah ha kano kano ka por namar bun bha ki kali baheh ki kit palat pud bad iaid katba mon namar ka jingbym don ka jingmana na ki bor pyniaid District ka thain.

Ka JSU kala pynapw ba haduh mynta khamtam ka Wah Lukha Bridge kala shah eh shrah khlem don kiba peit ban leh jurip da ki Engineer Expert jongka tnat treikam jong ka sorkar khnang ban ioh leh ia kaba donkam ban iadana ka jingkhyllem ha kano kano ka por. Ka JSU-Narpuh Circle ka kyrpad ia u DC ka East Jaintia District, Khliehriat  ban phah leh wut wut da ka jingjurip ia kine ki jingkieng khnang ban ioh ban iada (Preventive measures)  na ka jingkhyllem bad ruh ban phah shna ban pynkhlain shuh shuh khnang ban nym shah ktah ia ka leit ka wan jong ki paidbah.“Namar lada kine ki jingkieng khamtam ka Wah Lukha Bridge lada ka shu shah eh shrah kumne kan sa poi ka por ba kane ka jingkieng kan sa kdiah ne khyllem te kan sa ktah ka leit ka wan naduh ki kam khaii pateng, ka pang ka shitom, ka pule puthi bad kiwei kiwei. Kumta u DC ula kular ban shimkhia ban leh ia kaba donkam na ka bynta kine ki jingkieng” la pyntip ka seng JSU.

Ka JSU kala phah ruh ia katei ka jingthoh sha ka Regional Officer National Highways Authority of India, Guwahati, Assam, u Chief Engineer jongka Public Works Department (Roads) ka sorkar Meghalaya, u Executive Engineer ka Public Works Department NEC Division, Khliehriat , East Jaintia Hills District bad sha u District Transport Officer, East Jaintia Hills District, Khliehriat. Kane kal ong katkum kak yrwoh na u President ka JSU Narpuh Circle u F. Lamare.