Ka jingkynthoh ha Social Media ka la pynmong ïa ka sorkar : Symbud Myntri

U Myntri tnad Kam Pohiing ka sorkar jylla u bah Prestone Tynsong ula ong ba ki jingkynthoh ha ki rynsan Social Media ia ka jylla Meghalaya, ka la pynmong ia ka sorkar. U bah Prestone ula ong ba ki jingkynthoh ki rynsan pathai khubor nabar ia ka jylla Meghalaya kum ka ktem ki runar, ka long kaba pynmong haduh katta eh ia ka sorkar bad ki paidbah. “Ka jingsah dum ka jingshah kynnoh ba laiphew jait, mynta ka sngi ka la paw pyrthei da ka jingioh kem ia kiba donkti pyniap ia u Raja Raghuvanshi bad kane ka la pynshisha ba ka jylla Meghalaya kadei ka jaka kaba shngain na bynta ki briew kiba wan jngohkai ha kane ka jylla bad ki pulit ka jylla kidei kiba tbit tam ha ka ri,” ong u bah Prestone haba kren sha ki lad pathai khubor hynne ka sngi.

U Myntri ka tnad kam Pohiing ula ong ba ka jylla ka la pynshisha ba ki pulit ka jylla, kidei kiba tbit tam ha ka ri bad ula pynkynmaw ba kumno ki pulit ha ki 15 snem eiei, ki lah ban tehlakam ia ki lehnoh kieng atiar, khlem ka jingiarap jong ka sorkar pdeng. “ Ki pulit jong ngi kidei kiba tbit eh, ngim donkam ia ki shipai Army, ngim donkam ia kino kino ki bor shipai na ka sorkar pdeng, hynrei ngi la lah ban tehlakam hi. Namarkata nga kwah ban kyntu ia ki briew ha ri India ne shabar ka ri ba kimdei ban sngap ia ki khubor ban pynthame pynthohbria ban pyntieng pynsmiej,” ong u bah Prestone. Ula ong ba haduh mynta ki nongwan jngohkai ha kane ka jylla ki dang wan tuid bha bad ula pyntikna ba lyngba ka jingshisha ba la lap da ki pulit haba iadei bad ka jingshah pyniap u Raja, kan nang pynshlur ia kiwei ba kin nang wan jngoh ia kane ka jylla.

Haba kylli la ka sorkar kan dawa bai mynrain khmat, u bah Prestone ula ong ba ia mynta yn sa peit namar ba ka jingtohkit ka dang iaid shakhmat. U Superindent of Police (SP) ka East Khasi Hills u bah Vivek Syiem ula pyntip ruh ba ki pulit ki la mudui da ka Sou moto kes pyrshah ia ki katto katne ngut ki briew kiba kren pyrshah ia ka jylla da kaba pynmih ia ki kyntien ban pyniapher jaidbynriew ha kane ka jylla.