Shiteng miet wanpoi ka Sonam bad 4 ngut kiba donkti pyniap I’u Raja Raghuvanshi

Ka Iingkashari jong u First Class Magistrate u Bah DM Mihsil hynne ka sngi, ka la hukum ban set 8 sngi ne Police Custody ia ka Sonam Raghuvanshi ryngkat bad 4 ngut ki suba donkti ban pyniap ia u Raja Raghuvanshi ha Sohra. Haba iakren bad ki nongthoh khubor, u Superintendent of Police ka East Khasi Hills u Bah Vivek Syiem ula pyntip ba ka iingkashari ka la hukum ban set 8 sngi ha ka ‘Police Custody’ ia kitei ki 5 ngut kiba suba donkti pyniap ia u Raja Raghuvanshi. Ki 5 ngut ki ban shah tohkit ki kynthup ia ka Sonam Raghuvanshi ka kurim jong u Raja Raghuvanshi, u samla ka Sonam u Raj Kushwaha, u Akash Rajput, u Vishal Singh Chauhan bad u Anand Kuli. Ki pulit ki la ialam ia kine 5 ngut sha ka iingkashari hynne ka sngi ha ryngkat bad ka jingpahara jur. U Bah Vivek ula ong ki Pulit ki la pan por 10 sngi (Police Custody) ban pynlong ia ka jingtohkit ia kitei ki 5 ngut.

U Bah Vivek ula ong, ki pulit mynta kin sdang ia ka jingtohkit bad lashai ka sngi kin ym pat leit ban ialam ia kitei ki 5 sngut sha Sohra bad hadien ba la dep tohkit bad lum ia ki jingshisha ka SIT kan sa shim rai ban leit ialam ia kitei sha Sohra. Haba kylli la ki pulit ki dang don jingthmu ban kem shuh shuh ia ki briew kiba suba donkti, u Bah Vivek ula ong ia mynta ki pulit ki dang kem tang 5 ngut ba donkti pyniap ia u Raja bad ka jingtohkit ka dang iaid shakhamt kumta kin sa peit la kiba donkti ki dei tang 5 ngut ne ki dang don sa kiwei ruh. Ha kaba iadei bad ka jingsaphriang ki khubor ba la suba ka Sonam ka lah ban dei kaba la punkhun, u SP ula ong, ula iathuh ba ki pulit ki la ialam ia ka Sonam sha Ganeshdas Hospital ban khmih bniah ia ka koit ka khiah ka jong ka bad ban leh ruh ia ka Pregnancy Test ne ban khmih la ka la punkhun, hynrei ha ka Medical Report la shem ba kam shym la punkhun satia bad hadien ka 24 tarik yn saphah peit biang ia ka.

Ki pulit ka jylla ki la wan ialam ia ka Sonam ha ka por 12:40 ha ka step phyrngab ka sngi Balang ha Sadar Police Station bad hadien shiteng kynta tam ki la leit rah noh ia ka Sonam sha Ganesh Das Hospital ban leh ia ka medical Check Up bad hadien ba ka la pyndep ia ka jingkhmih bniah ia ka koit ka khiah ka jong ka ki la ialam biang noh ia ka sha Sadar Police Station. Ha ka por 10 baje mynstep pat, ki pulit ki la wan ialam sa ia ki 4 ngut kiba kynthup ia u samla ka Sonam u Raj Kushwaha, u Akash Rajput, u Vishal Singh Chauhan bad u Anand Kuli bad ia kine ruh la buh ha Sadar Police Station bad hadien katto katne kynta, ki pulit ki la ialam ia kitei baroh 4 ngut ryngkat bad ia ka Sonam sha ka iingkashari na bynta ban shah tian bishar. Kum ban shu pynkynmaw ka Sonam bad u Raja Raghuvanshi ki la jah klep naduh ka 23 tarik u Jymmang ha Sohra bad ha ka 2 tarik u Jylliew ki pulit ki la lap ia ka metiap jong u Raja na kawei ka jaka ba don hajan ka Kshaid Weisawdong ha Sohra bad hadien kane ki la iai bteng ban wad ban lap sa ia ka Sonam. Hynrei ha ka step jong ka 9 tarik mynta u bnai, ka Sonam ka la leit ban aiti noh ia lade ha ki pulit jong ka jylla Uttar Pradesh. Ki pulit ki la iathuh ha ka jingtohkit ki la lap ksai ba ka Sonam ka donkti lang bad u Raj Khushwaha ban iasuh buh ban pyntip ia u Raja da ka jingiarap jong ki 3 ngut kiwei pat ki briew.