Ka jingpynkhreh ia ka Lympung ki Khynnah Seng Khasi Seiñ Raij ha Tuber Shohshrieh

Ka jingpynkhreh iaka Lympung ba 21 jong ki Khynnah Seng Khasi Seiñ Raij  ka ban sa long haka 17 bad 18 tarik mynta u bnai ha shnong Tuber Shohshrieh, East Jaiñtia Hills District kala iaid shait shait shakhmat naduh ka jingpynkhreh iaki rynsan pynlong lympung ha madan Nohsiang, ka jingshna ia u surok  ban leit shaka jaka long lympung, ki jaka pynieng kali, ka  jingpynkhuid paidbah iaki lynti syngkieng nalor kiwei pat.Ha kane ka jingpynkhreh la ia shim bynta lang naduh ki nongialam ka Lympung ki Khynnah Seng Khasi Seiñ Raij, ki nongialam ka Seiñraij Shnong Tuber Shohshrieh, ki nongialam shnong ka shnong Shohshrieh, ki paidbah nongshong shnong nalor ki tnat treikam sorkar.U Waheh shnong Tuber Shohshrieh u Lar Bang bad u President Seiñraij shnong Tuber Shohshrieh u Ram Muruh, haba kren shaki lad pathai khubor mynta ka sngi ki pynpaw ka jingsngewkmen ban pdiang ia kane ka Lympung, ha kajuh ka por ki pdiang sngewbha ia baroh ki paidbah na kylleng ka rilum Khasi bad Jaiñtia sha kane ka Lympung.

Ki kyrpad ruh ba ym dei ban tieng haba iadei bad ka bam ka dih, khamtam ki delegates kiba hap wan sah lypa naka bynta jong ki la pynkhreh ki jaka sah bad ka bam ka dih. Halor ka jingwan kane ka Lympung ki sngewkmen ba kum ka shnong ruh ka ioh shibun ki jingmyntoi naki tnat sorkar. Na ka liang u President ka Lympung ki Khynnah Seng Khasi Seiñ Raij u Puramon Kynjing  u ong, kane ka lympung dei ka jingpynkut iaka tamasa lehkmen ki khynnah bala pynlong naduh u bnai December 2025. Ha kane ka sngi pynkut yn pynlong daka jinglehkmen ki khynnah ki ban pyni iaki sap ki phong lyngba ki riam, ki jingkren khana, bad kumba kane dei ka lympung ba kyrpang ki khynnah yn pyniaid ruh daki khynnah hi katba ki riew ryngbah pat ki long tang kum ki nongialam. Haba iadei bad ki lynti syngkieng u President Puramon Kynjing u iathuh ba ka jingjngai na Jowai sha Tuber Shohshrieh ka long kumba 15 Kilometer. Ban leit sha jaka long lympung hap ban rung na u surok bala pynkhreh kyrpang najan ka ïing Duwan Tuber Shohshrieh.

Kam don ka jingpynkhreh Car Pass iaki nongwan hynrei kiba poi kloi kin ioh buh kali hajan jaka long lympung.  Ha kajuh ka por u kyrpang ruh iaki paidbah ban ym buh kali harud surok hynrei haki jaka bala pynkhreh khnang ban ym thut ka rung ka mih ki kali. Bad namar ba ka jaka ka don harud surok u kyntu ban poi kloi shaka lympung khnang ban ym thut ki lynti syngkieng nalor ban long kiba lehkhuid.