Ka kamram ka sorkar ban pynthikna ki samla kim dei leit phai sha ki kam lehnoh

U Nongialam ka Liang Pyrshah u Dr Mukul Sangma ula kyntu ia ka Sorkar Jylla  ban long kaba husiar, kaba peitngor bad kaba shimkhia ia ki jingma kiba lah ban mih bad ban weng ia ki jingeh kiba pynlong ia ki samla ban leit iasoh ne seng kynhun lehnoh. Haba kren sha ki lad pathai khubor u Dr Mukul ula buh jingkylli ruh halor ki jingjia ha kaba ïa dei bad ka jingwan pyndem wait jong ka Drishti Rajkhowa u nongïalam barim jong ka United Liberation Front of Asom (ULFA) ha South Garo Hills. U Dr Mukul ula iathuh ba mynshwa ula kdew ia ka jingdon jong u Rajkhowa ha Garo Hills bad ïa kane la pynshisha hadien da ka jingwan pyndem wait noh jong u bad haduh mynta ki don katto katne ki jingkylli  ba ka Sorkar kam pat lah jubab. U la buh jingkylli ruh ia ka jingdon jong ki katto katne briew ba ia synran ia u Rajkhowa ha ka por ba u wan pyndem wait bad ia ki bor synshar ba u Rajkhowa u wan pyndem wait.

“Ngi donkam ban buh jingkylli ïa ka Sorkar…katno ngut ki samla ki don hangta, Hato la khmih lynti ba un don ha ka bynta kaba jngai tam jong ka ri ryngkat bad tang arngut ki nongbud bad haba u la pyndem wait, katno tylli bad kiei kita ki tiar ialeh ba ula aiti haka por pyndem wait” ula ong. U Nongialam ka Liangpyrshah u la kynthoh ia ka Sorkar, khamtam ia u Myntri Rangbah ka jylla u Conrad K Sangma daka ba ong ba u kloit beit ban kyntait bad kyntait ruh ban shim ia ka jingkitkhlieh ban pynthikna ia ka jingsuk bad ban khanglad ia ka jingmih biang jong ki kam lehnoh ha ka Jylla. “Kane ka Sorkar ka kloi beit ban kyntait khamtam eh u Myntri Rangbah ka Jylla. Phi kylli ia kano kano ka kam. Phi kylli shaphang ka jingtih dewiong un long uba kloi bha ban kyntait. Hynrei ka jingkitkhlieh jong ka jingsynshar bad ban pynthikna ba kan nym don kano kano ka jingshah pynthut ia ka jingsuk ngi donkam ba shim ka jingkitkhlieh bad ban khanglad ban mih biang ki kynhun ne ki kam pyntriem” u la pynpaw.

Haba kyntu ïa ka Sorkar ban long kiba husiar bad ban shimkhia, u Myntri Rangbah barim ula ong “Haba ngi ïakren shaphang ki jingioh jingtip, hato kane ka jingioh jingtip kadei tang ha ri lum Khasi Jaiñtia? Hato ym ioh jingtip na Garo Hills, kadei kam kamram jong ka Sorkar ban bishar bniah iaki jingtip ba ioh lum. Ka lah ban ban long ba u Myntri Rangbah um iahap ban ïakren ïa kane ka mat ha khmat ki lad pathai khubor hynrei kadei pat ka kamram jong ka Sorkar ban long kaba husiar bad kaba shimkhia”. “Ka Sorkar ka dei ban tip kiei ki daw kiba pynlong ïa ki samla ban pyrshang ban leit iasoh ne thaw kynhun lehnoh bad ngi donkam ban pynthikna ba ngim ailad ïa kine kiei kiei ban roi bad ka dei ka jingkitkhlieh jong ka Sorkar ban shimkhia halor kane daka jingkitklieh, da ka jingsngewkhia, da kaba hok, da kaba janai bad kaba shisha na ka bynta ka jingbha jong ki paidbah bad ka Jylla” ula bynrap.