Ka MeECL imat ka ap haduh ban da jia ki jingjia ba sngewsih ban leh eiei ia ki post ilektrik ba la tor: SRS

Ka Synjuk ki Rangbah Shnong (SRS) San Shnong Manad Area ka la ther tyngeh ia ka Meghalaya Energy Corporation Limited (MeECL) halor ka jingbym lah jongka ban maramot bad bujli ia ki post ilektrik ba la sarang ha ki san tylli ki shnong ha ka thain Manad, 20 Km na Mawkyrwat, South West Khasi District watla ki bor shnong ki la ju pyntip na ka por sha ka por.

Haba ïakren bad ki lad pathai khubor, u President ka SRS San Shnong Manad Area, u Bah Reddy Shylla ula pyntip ba ki don shibun ki post ilektrik kiba la sarang ha ka Manad, Pyndenlyngdoh, Mawbidong, Pynden Sohlang bad ka shnong Lummawbah kiba la kylla long ka jingma kaba khraw ïa ki paidbah ka thaiñ khamtam ha ka por lyiur. Ula pyntip ruh ba ha ka por lyiur ki don katto katne ki longïing kiba la hap ban leit sah noh sha ki iing jong ki paramarjan namar ka jingsheptieng ïoh kyllong ki post ilektrik.

U Rangbah Shnong ka Mawbidong, u Bah Tanlum K. Kharai ula pyntip ba ki paidbah ka shnong Mawbidong mynta ki im hapdeng ka jingsyier namar ba u Transformer uba don ha katei ka shnong u lah ban hap bad kyllon ha kano kano ka por sha ki iing kiba don marjan namar ka jingtwa khyndew kaba ju jia manla u snem khamtam eh ha ki por lyiur. Ula pyntip ba ki heh MeECL shiphew snem mynshwa ki la wan jngoh ia katei ka shnong da ka jingthmu ban pynkynriah noh ia utei u Transformer sha kawei pat ka jaka, hynrei haduh mynta kim pat leh eiei.

Haba kynthoh ia ka jingbym don jingkitkhlieh jong ka MeECL halor ka jingbym pyrkhat ia ka jingshong shngain jong ki paidbah, u Bah Reddy ula kynnoh ba naduh ba ki paidbah jong kitei ki san tylli ki shnong ki la ioh bording kumba 40 snem mynshwa, kam shym la don kano kano ka jingmaramot ne bujli ia ki post ilektrik ha katei ka thain wat hadien ba ka Synjuk ki Rangbah Shnong kala ai jingtip na ka por sha ka por.

“Imat ka MeECL ka ap haduh ban da jia ki jingjia ba sngewsih kynthup ïa ka jingïap jong ki briew ba kin sa shimkhia ba leh eiei halor kane ka bynta. Ka long kaba sngewsih shibun ba ka MeECL kam ju pyrkhat ïa ka jingshngaiñ jong ki paidbah, hynrei ka shimkhia tang ban wan lum bill,” ong u Bah Sylla, da kaba bynrap ba ka MeECL ka dei ban shimkhia ïa kane ka kam namar ba ka ding ilektrik kam dei satia ka ‘grant’ ba ai ei da ka sorkar, hynrei ki paidbah ki hap ban siew da ka umsyep jong ki.

Kumta ka SRS San Shnong Manad ka la dawa na ka MeECL ba ka dei ban bujli mardor ia ki post ilektrik kiba la sarang ha katei ka thain bad ha kajuh ka por ban pynkylla ruh ia ka lain ha ki katto katne ki jaka na ka bynta ka jingshngain jong ki paidbah.