Ka MoMSME kan iarap ban shalan mar shabar bad ki iew ha pyrthei

Ka tnat Commerce and Industries ka sorkar jylla ryngkat ka jingiatreilang bad ka Federation of Indian Export Organisations (FIEO) hynne ka sngi ki la pynlong ia ka Reverse Buyer–Seller Meet (RBSM) 2026 ha State Convention Centre, Shillong.Ia kane ka RBSM la pyllong hapoh ka skhim Raising & Accelerating MSME Performance (RAMP) jong ka tnad Ministry of Micro, Small and Medium Enterprises (MoMSME) ka sorkar India. Kane ka jingialang ka thmu ban pynkhlain ban shalan mar shabar bad ban pynsuk ia ki MSME jong ka jylla ban ioh rung ha ki iew ka pyrthei.Haba kren ha kane ka sngi u Myntri Rangbah u Conrad K. Sangma, ula ai khublei ia ka tnad Commerce and Industries bad ia baroh kiba la iadon bynta ban pynlong ia kane ka RBSM.U la ong ba kane ka dei ka sngi ba sngew sarong ia ka jylla namar ba ha sien ba nyngkong la lah ban pynlong ia kum kane ka jingialang.

U Myntri Rangbah ula ban ba ki kam kum kine ki RBSM ki dei ban wallam ia ki jingkylla kiba shisha.U la kdew ba wat la ka jylla ka dei kaba rit, hynrei lada iaineh bad trei shitom, ka jingkylla ka lah ban wan. U la ai nuksa ia ka tnat IFAD kaba la jan khang, hynrei mynta ka la kylla long kawei na ki projek ba bha tam ha ka pyrthei.“Ym don kaei kaei kaba lah ban kylla tang shi miet. Ban wanrah jingkylla, donkam ia ka jingkut jingmut bad ka jingiohi jngai bad donkam ia ka thong,” ong u Myntri Rangbah.U la ai nuksa ba ki nongrep sohtrun mynta ki la lah ban pyniaid iew ia ki mar rep jong ki shaduh shabar ri. Ula ban jur halor kumno ban kyntiew ia ki nongrep bad kumno ban pyniasoh ia ki nongthied bad ki nongrep bad kumjuh bad ki nongtrei kam lade. Ha kane ka sngi, u Myntri Rangbah u la pyllait ruh ia ka Megha Rise Logo & Brand bad ka State-level MSME Portal ban pynkhlain bad ban pynsuk ia ki nongkhaii ban ioh ia ki jingshakri lyngba ka juk mynta.

Na ka liang u Symbud Myntri Rangbah u bah Sniawbhalang Dhar, ula ong ba kane ka dei ka sngi ka ban sah kynmaw.Ula pynshai ba ka RBSM ka pher na kiwei ki iew pyninam namar ka dei ka rynsan kaba thmu kyrpang ban pyniadei beit ia u nongthied  bad u nongdie ha ka kam khaii pateng.Ula pyntip ba ha kane ka jingialang, ki don 28 ngut ki nongthied ia ki tiar na ki 16 tylli ki ri kiba kynthup ia ka South Africa, Zimbabwe, Slovakia, Turkiye, Nepal, New Zealand, Russia, Bahrain, Kenya, Australia, Uganda, Gambia, Azerbaijan, Sri Lanka, Canada, bad Romania. U Chief Secretary, Dr. Shakil P. Ahammed, u la kyntu ia ki nongkhaii ban pynbit pynbiang ia ka rukom shna mar ba kan long kaba bha tam.