Ka MRSSA ka la treikam ha bun ki shnong, watla kam pat treikam lut ha baroh

U Myntri Rangbah ka jylla u Conrad K. Sangma ula ong ba ka ain shongwai ne ka Meghalaya Resident Safety and Security Act (MRSSA) ka la treikam ha kiba bun ki shnong, watla kam pat treikam lut ha baroh.Haba kren sha ki lad pathai khubor hynne ka sngi, u Conrad ula ong ba ka long kaba bakla ban ong ba ym pat pyntreikam ia ka MRSSA.“ Ha kiba bun ki shnong la pyntreikam ia ka MRSSA,watla ym dei ba la treikam ha baroh ki shnong. Namarkata ka long kaba bakla ban ong ba ym pat pyntreikam ia ka MRSSA,” ong u Conrad. U Myntri Rangbah ula ong ba ka sorkar ka dang pyrkhat ban wanrah ka ain thymmai ha jaka ka MRSSA namar ba ka ain ka long ban don ki jaka talasi briew ne ki entry bad exit point watla la kdew ha ki rules ne kyndon.

Ula ong ban don ka Entry bad Exit Points, ka donkam ban pynrung ha ka ain, ym ha ki rules.“ Ka Rules kam lah ban ong ba lah ban don ki khyrdop namar ba ha ka ain kam shym don ka kyndon ba kdew ba lah ban buh ia ki khyrdop Entry bad Exit point,” ula ong.Haba iadei bad ka Inner Line Permit (ILP), u Conrad ula ong, ba ki paidbah kim dei ban pynkut nia ba ka sorkar India kan wanrah da ka Immigration and Foreigners Act 2025 ha jaka ka Inner Line Permit (ILP) khlem da iohi ne tip shwa ia ka jingshisha. U Myntri Rangbah ula ong ba ka sorkar kam kwah ban iaid lait ia ki kynhun bapher bapher halor kane hynrei kan iai syllok bad kan iai buddien na ka sorkar India ban ai ia ka ILP kumba la dawa ka jylla.

Ula bynrap ba ka thong ka dei ban tehlakam ia ka jingwan rung ki briew nabar bad ka sorkar ka dang wad ia ki lynti, kaba kumno ka lad ka lynti kaban lah ban tehlakam halor kane.“Ngin sa khot iakren ia baroh ki kynhun bapher bapher bad iathir iatai halor ka Immigration &Foreigners Act,2025,”ula ong.