Ka Parking Policy, kan iarap pynkylluid ia ka nongbah Shillong na ka jingdheng kali

U Myntri kam pynroi sor u Bah Sniawbhalang Dhar hynne ka sngi ula pynbna shen ka Sorkar kan pyntreikam ia ka Meghalaya Urban Parking Policy 2025. Lah ban kdew ba ka Sorkar Jylla dang shen ka la mynjur ia ka Meghalaya Urban Parking Policy 2025, ban pynbeit ia ka jingpynieng kali ha ki surok ha kylleng ki jaka sor bad khapsor jong ka jylla. Haba kren sha ki lad pathai khubor u Bah Sniaw ula ong, ba ka Parking Policy ka thmu ban weng ïa ka jingkhapngiah ha Shillong, da kaba ithuh ia ki katto katne ki jaka ban shah ban ïeng kali.

“Ka jingpyntreikam ïa ka polisi pynïeng kali kan ïarap ban pynduna ïa ka jingpynïeng kali ha surok, namar ba yn ym shah ïano ïano ban pynïeng kali ha surok da kaba shu leh lyndet” la ong u Bah Sniaw. U Bah Sniaw u u la ong ba ka jingpynieng kali khlem da khein snep ha ki surok ka la long kawei na ki daw bah jong ka jingkhapngiah kali. “Kumta ngin sa ithuh ia ki surok ba kyrpang ha kaba yn shah ban ieng kali ha surok” u la ong.“Ka Parking Policy kan wanrah ia ka rukom kaba la buh ryntih ha kaba yn shim ia ka bai ieng kali, bad yn buh ia ki jaka ieng kali ba la ithuh kyrpang. Kane kan pynthikna ba ki briew kin ym pynïeng kali klumar namar yn kdew shai, kino ki jaka ba long pynïeng kali bad kino ki jaka ki bym long ban pynïeng kali” u la ong.

U Myntri ka tnat Pynroi Sor u la pynksan ruh baka rai jong ka Sorkar Jylla ban pynkynriah noh ia ka Secretariat sha New Shillong kan iarap ban pynduna ia ka jingkhapngiah kali ha nongbah Shillong.