Ka PHE kam ioh jaka ban sam um ha Mowkaiaw

U Myntri ka tnad PHE u Marcuise N.Marak ula kam ba ka sorkar kam pat ioh jaka na bynta tei ia ka skhim sam um ka Water Supply Scheme ha Mowkaiaw.Ula ong ba mar ia ioh ia ka jaka, ka sorkar kan sa pynkhreh noh ia ka Detailed Project Report (DPR) na bynta tei ia ka skhim sam um ka Water Supply Scheme ha Mowkaiaw. Ia kane u Myntri ula pyntip ha Iing Dorbar thawain ka jylla haba jubab ia ka jingkylli ba la wanrah da u MLA ka Mokaiaw konstiwensi u bah Nujorki Sungoh. Katkum ka jingong u Myntri, ka sorkar kan mang pisa na bynta kane ka skhim hynrei ka jingeh ka long ba ka tnad haduh mynta kam pat shym la ioh jaka ban tei ia ka skhim sam um ka Mookaiaw Water Supply Scheme.

Halor kane, na ka liang u MLA ka Mowkaiaw ula pyntikna ba ka jaka ym don jingeh ban ioh namar ba ki briew kin kloi ban ai sngewbha. U bah Nujorki ula pyntip ba ka jingbun briew ha ki 3 tylli ki shnong ka thain Mookaiaw kala kot sha ka 15000 ngut kynthup 2300 ki tnum iing bad ula kyntu ia u myntri ban pynsted noh ia ka ka kam namar ki paidbah ,kila kynduh jingeh na ka jingbym biang ka um bam um dih. Ula ong ba ki briew ha kine ki shnong ki shem jingeh man u snem haba iadei bad ka um bad ula pynkynmaw ba ki briew ki hap ban khie dang step phyrngab ban leit tong um na wah bym biang ka um ha shnong.

Na ka liang u myntri,  ula pynpaw ia ka jingsngew tynnad ba u MLA ka thain ula pynthikna ba ka jaka kam don eiei ban ioh bad tang shu ioh ia ka jaka, yn pynkhreh ia ka Detailed Project Report (DPR). U Myntri ula pyntip ruh ba ha kane ka projek yn kynthup ban shna ia ka dam bad ia ka jaka ban pynkhuid ia ka um.