Ka Rel kit mar ka pynduna dor marbam, ym dei ban tynruh jubor haba don ba pyrshah : Pala

U President ka Meghalaya Pradesh Congress Committee (MPCC) u Bah Vincent Pala u la ban jur ba ka jingdon ka Rel kit mar (Goods Train) ka iarap shibun ban tehlakam iaka jingkiew dor ki marbam mardih bad ki mar ba donkam (Essential Commodities).Haba pynpaw iaka jingkyrshan iaki Rel kit mar (Goods Train), u Bah Pala u la ban jur iaka jingdonkam ban iasyllok lang bad baroh hashuwa ban shim iaka rai namar haka synshar paidbah, kam ju dei ka nongrim ban shu tynruh jubor lada don ka jingpyrshah.U Bah Pala u la ïathuh ba haka por ba u dang long MP ka Shillong Parliamentary bad Myntri Sorkar Pdeng u la pynioh bun ki jingtei ba donkam (Infrastructure) kum ka surokbah National Highway (4 Lane), Airport hynrei kum u MP u dang sah nud namar u khlem lah ban pynioh lynti Rel ha rilum Khasi-Jaintia.

U la ong ba ki don ym duna 22 tylli ki khyrdop lum khajna naki trok bad ki kali kit mar haki surok naduh na jan Guwahati haduh Silchar bad kane kala pynlong iaki mar mata ban kiew dor hapoh Meghalaya. “Kiba bun ki ki kwah ban wan ka Rel kit mar (Goods Train) namar kan iarap ban pynduna iaka dor jong ki mar mata. Haka por ba ba long Myntri Sorkar Pdeng nga la pynioh ka jigmynjur ban wanrah Rel kit mar ha Rilum Khasi-Jaintia hynrei wat lada nga kwah Rel kam mut pat ba ngan tynruh jubor iaki ba pyrshah lynti Rel” la ong u Bah Pala.

U Bah Pala u la ong ba u kyrshan iaka sur jong ki paidbah khamtam ki sengbhalang kiba la pynpaw ba ka lynti Rel ka wanrah ka jingwan buhai shnong beain ki bar Jylla hynrei u la ban ba haka juk ba mynta ki bar Jylla ki lah ban wan na kano kano ka rukom.