Ka Requiem Mass 3 sngi ha ki Parish, shabar ka St. Peter’s Basilica yn tep ia u Pope Francis

Ka Balang Catholic hynne ka sngi ka la pyntip ba kan pynlong ia ka ‘Requiem Mass’ ha Cathedral Church, Laitumkhrah ka sngi on tep ia u Pope Francis bad ka Mass kan sdang ha ka por 10 baje mynstep Sngi Saitjain. U Bah Bedarius Shylla jong ka Media and Publicity Commission ka Shillong Archdiocese haba iakren bad ki nongthoh khubor ha Shillong Press Club, ula ong ha Shillong Archdiocese yn pynlong ia ka Requiem Mass ha ka 23, 24 bad 25 tarik u Iaiong ha ka Cathedral Church, Laitumkhrah ha ka por 5:30 janmiet bad ha baroh ki Parish jong ka Archdiocese bad ia ka por yn pynbeit hi da ki Parish bapher bapher. Ula ong ha ka 26 tarik Iaiong ka sngi on tep ia u Pope Francis, yn pynlong ia ka Requiem Mass ha Cathedral Church, Laitumkhrah ha ka por 10 baje mynstep bad ha baroh ki Parish jong ka Archdiocese ha ka por 10 baje mynstep.

Ula bynrap ki riewngeit ki lah ban iashim bynta ha ka jingleh Mass leit tep ia u Pope Francis ha ka por 1:30 mynsngi lyngba ka Online Media. Kum ban shu pynkynmaw ha ka 21 tarik u Iaiong, u Cardinal Kevin Joseph Farrell, ula pynbna ba u Pope Francis ula khlad noh ha ka por 7:35 mynstep (por Vatican) ha ka jaka sah ha Domus Sanctae Marthae, Vatican City ba dei ka ‘Easter Monday’ bad ula pynbna ba u Pope ula khlad namar ka jingpang kyndeh bym tip briew (Stroke, Coma) na ka jingbym lah treikam shuh u klong snam.

La pynbna ka jingon tep ia u Pope Francis kan long ha ka 26 tarik Iaiong bad ia kane ka jingleh niam yn pyniaid da u Cardinal Giovanni Battista Re, Dean jong ka College Cardinals bad u Pope Francis un dei ruh u Pope banyngkong ban tep shabar ka St. Peter’s Basilica, Vatican bad kane ka dei katkum ka jingkwah ka jong u Pope.