Phah jingthoh ka NEIGRIHMS sha ka sorkar pdeng ban pahara da ki CAPF ha Hospital

Ki bor pynïaid ka Hospital North Eastern Indira Gandhi Regional Institute of Health and Medical Sciences (NEIGRIHMS) hynne ka sngi ki la thoh sha ka tnat Ministry of Health and Family Welfare ka Sorkar Pdeng ha ryngkat ka jingdawa bor pahara Central Armed Police Forces (CAPF)  hapoh kane ka Hospital. Kane ka jingdawa bor pahara CAPF ka wan hadien ka jingleit tur kynsan ki dkhot ka Hynniewtrep Youth Council (HYC) bad Khasi Students Union (KSU) shaka ophis treikam Administrative Block jong ka NEIGRIHMS halor ka jingdawa thungkam Nurse. Haka shithi sha u Joint Secretary ka tnat Ministry of Health and Family Welfare ka Sorkar Pdeng, u Deputy Director (Admn) ka NEIGRIHMS u Pawan Deep u la ong ba haka 4 tarik Iaiong ki dkhot ka HYC ba don kumba 50-100 ngut kila wan tur kynsan shaka ophis treikam Administrative Block bad kila phah mih shabar ïa u Director ka Hospital.

U Deputy Director (Admn) ka NEIGRIHMS u la ong ba kane ka jingwan tur ki dkhot ka HYC ha ryngkat ka jingpyrta ka buh jingma iaki nongtrei, ki ophisar bad ki briew nalor ka buh jingma ruh iaki jingdon jingem jong ka Hospital. “Halor kane ki bor pynïaid kila dep ban ujor daka ejahar pyrshah iaka HYC” u la pyntip. U Deputy Director u la pyntip ruh ba kum kine ki jingjia kim dei shuh ki sien ba nyngkong bad kum kine ki jingjia kim jia tang hapoh NEIGRIHMS hynrei ki jia ruh ha kiwei ki Ophisr Sorkar Pdeng kiba don ha kylleng ka Jylla.

U la kam ba ka Hospital ka pat biang ki bor pahara namar iaka kam pahara la shu ai wai sha kiwei ki Company. “Ki bor pahara kim don iaki tiar kiba biang bad kim pat ioh kano kano ka jingshah hikai pyntbit ban tem ïa kum kine ki jingjia kaba buh jingma ïa bun balang” u la ong. Halor kane u Deputy Director (Admn) ka NEIGRIHMS u la kyntu iaka Ministry of Health and Family Welfare ka Sorkar Pdeng ban phah daki bor pahara CAPF ban pynkhlain shuh shuh iaki bor pahara hapoh kane ka Hospital.