Ka sorkar ka dei pyniaid hi ban sam bording, ka SAI Computer ka la kjit lut na ki longiing ha Mawsynram

Ki kynhun sengbhalang jong ka thain Mawsynram C&RD Block hynne ka sngi ki la leit ban ai dorkhas sha u MLA ka Mawsynram u bah Ollan Sing Suin bad u MLA ka Ranikor u bah Pius Marwein ban phah tuklar halor ka jingsam bording ba la pyniaid da ka SAI Computer, Ltd. Kine ki kynhun sengbhalang kiba kynthup ka Hynniewtrep Youth Council (HYC), Federation of Khasi Jaintia & Garo People (FKJGP), Hynniewtrep National Youth Front (HNYF), ki la ong ba ka jingaiti ka sorkar sha ka SAI Computer Ltd ban pyniaid ia ka Mawsynram Sub Division, ka la kjit lut ia ka um syep jong u briew uba duk ba suk namar ka jingkiew pathar ka bai bording kaba la ktah ia ki paidbah. Ki la ong ba kin ieng pyrshah ia kane ka kompeni bad la dawa ba ka sorkar ka dei ban shim ban pyniaid hi ia kane ka Mawsynram Sub Division.Haba kren sha ki lad  pathai khubor, u nongialam ka HNYF u bah Kyllang Thongni, ula ong ba hadien ba ka sorkar ka la aiti ia ka Mawsynram  Block ha ka SAI kompeni, ka bai thang ding ka la kiew 10 shah ban ha ka por ba pyniaid ka kompeni Feedback Energy Distriibution Company (FEDCO).

Ula ong ba mynshwa haba ka sorkar ka aiti ban pyniaid sha ka FEDCO, ka seng ka la lap ba don bun ki jingduna bad ka sorkar ka la pynkut noh. Hynrei mynta pat ha ka 1 tarik Naiwieng, 2025 ka sorkar ka la aiti sa ha ka SAI kompeni, khlem kano kano ka jingioh jingmynjur na ka shnong, ki MLA, khlem ka Trading Lisen bad khlem ka jingpynshai paidbah.La kynnoh ba kane ka kompeni ka la shu wan beit da ka bor.  “Kane baroh kadei ka jingpyrshang ka sorkar ban khniot ia bein ia ki paidbah baduk basuk ha kane ka thain,” ula ong.U bah Thongni ula ong ba ki briew kiba shong ha ki thain khappud jong ka Ranikor, Mawsynram kumba 70 percent ki briew kidei kiba duk ba suk bad bun kidei kiba dang hap ban shaniah ha ka kam rep kam riang.“Ka jingwan shimti da kane ka kompeni thymmai, ka bai thang bording ka kiew 10 shah bad kane ka khlem iahap bad ka rukom thang,” ong u bah Thongni.Ula bynrap, “Ki don ki iing kiba shu wan sah kai ha ka shisien shi snem ruh ka bai thang ding ka poi da ka 700 ne 800 tyngka bad wat ki iing mane ki bym shym la don konekshon PA System ruh ki poi 800 tyngka.”

Halor kane, na ka liang ki MLA ka thain, ki la kular ba kin rah ban iakren bad u Myntri ka tnad ba dei khmih ia ka bording ban iakren bad ka sorkar bad kin rah ruh wat sha ka Iing Dorbar Thawain kaban sa long shen.Na ka liang ki kynhun sengbhalang, ki la pynpaw ka jingsngewlyngoh namar ba tang ia ka Mawsynram Sub Station la aiti sha ka SAI bad kane ka pynpaw ba ka sorkar ka pyrshang ban khniot bein ia ki briew kiba duk. Ki la ong ba lada ki nongtrei na ka MEPDCL bad ka SAI kompeni, ki ophisar , ki kular ba kin siew ma ki ia ka bill na bynta ki briew, kin shah ia ka SAI ban shong hynrei lada ka wan ban lute, ka seng kan ieng pyrshah.