Ka sorkar ka la iarap T.6.8 klur ia 3005 ngut ki nongrep kwai: Ampareen

Ka Myntri ka tnad ka rep ka riang ka Kong Ampareen Lyngdoh ka la iathuh ba ki don 8 tylli ki district ba ki nongrep ki shah ktah na ka jingbam khniang ki dieng kwai kaba la tip kum ka ‘Bud Rot Disease’. Haba jubab ia ka jingkylli ba la wanrah da u Rupa M Marak u MLA ka Dadenggre ha Iing Dorbar ka jylla, ka kong Ampareen ka la ong ba haduh kumba 10 percent eiei ka jingthung kwai la shah ktah na une u khniang jingpang. Ka kong Ampareen ka la ong na bynta ban iakhun pyrshah ia kane ka jingeh jong ki nongrep, ka tnad ka dang iasyllok bad ki saiantis ka ICAR bad kiwei ki tnad ban ialeh pyrshah ia ka jingpang kwai khamtam ha thain Dadenggre, West Garo Hills. Ka la iathuh ba ki don 209 ngut ki nongrep ki shah ktah ha ka Dadenggre Block bad 406 ngut ki nongrep ha Rongram Block.

Ka kong Ampareen ka la iathuh ruh ba ka sorkar ka la ai jingiarap T.6.8 klur sha ki 3005 ngut ki nongrep kwai kiba shah ktah na ka jingsniew u kwai ba kin ioh ban rep da kiwei ki jingthung kum ka jingthung kait, u Sohtrun bad kiwei de. Ha kajuh ka por, ka la ong ba ka sorkar ka dang mang pisa sa T.5 klur lyngba ka RKBY, khnang ban iarap ia ki nongrep bad ban pyntikna ban nym don jingthut ha ka kam ka jam jong ki. Katkum ka jingiathuh ka Myntri, ka daw ka jingpang ka dei na u kynja khniang uba bam ia ki bynta ba dang lung u kwai.

Na ka liang u bah Lahkmen Rymbui u MLA ka Amlarem haba bynrap halor kane, u la buh jingkylli hato ka don lad ba ka sorkar kan pyndonkam da u drone ban kynshait dawai na kliar u dieng kwai kumba la hikai ki stad ban iada na ka jingpang u kwai. Halor kane ka kong Ampareen ka la ong ba ka sorkar kan eksamin ia kane bad kan shim ia ki lad ki lynti ban iarap ia ki nongrep.