Ka sorkar ka la mang T.45 klur, ka jingkynthoh bym shngain ka PA Sangma Stadium ka bakla

U Myntri Rangbah ka Jylla u Conrad K Sangma hynne ka sngi ula pynshai halor ka jingthoh ba la mih ha kawei ka kot khubor kaba ong, ‘ka PA Sangma Statium ka dei bym shngain katkum ka jingpynbna ka District Disaster Management Authority (DDMA)’ ka dei ka khubor ba ialam bakla.

Ula ong ka PA Sangma Stadium ka don 3 tylli ki kyndong ne Corner ba dei shi bynta jong ka Football Stadium bad shibynta ka jingtei ha ka wat banyngkong, ka West Stand ne ka jaka shong sha sepngi ka dei kaba la tei lypa ha shwa ba ngin sdang ia kane ka projek bad ka la don ka kynroh bad lada phi kynmaw kane ka kynroh ka la khyllem noh bad kumta ka sorkar jylla ka la mang T.45 Klur bad ka la khot ia ka Tender bad ka kam kan sa sdang noh shen.

“Ha katei ka kam, ngi donkam khyndiat ia ka jaka na ka Coal India bad ngi donkam ban pyniar ia ka West Stand bad ha kajuh ka por ngi donkam ruh ia ka surok na ka bynta ki shnong ba sah ha katei ka thain, ngi lah donkam shuh ka jaka kumta ka DDMA ka la thoh sha ka Coal India ban ai jaka ban ioh pynheh ia ka West Stand ne ka jaka shong sha sepngi, namar kane ka jingtei baroh kan ym long kaba shngain lada ym ioh jaka na ka Coal India khamtam haba kane ka West Stand ka dei kaba donkam ban shna noh mardor” la ong u Conrad.

U Myntri Rangbah ula ong, katei ka jingkynthoh kam dei satia ba ka stadium baroh kawei kam don ia ka jingshngain hynrei ka dei ka pan ia ka jaka na ka Coal India ban pynheh ia ka West Stand bad kumta ka rukom thoh ia ka khubor ka dei kaba la ialam bakla bad na ka liang ka Tnad Sports kan sa phah ia ka jingthoh ban ai jingpynshai halor kane.

U Myntri Rangbah ula kyntu ki nongthoh khubor ban da wad jingtip bniah shuwa ban pynmih ia ka khubor namar ba ka la ialam bakla ia ki paitbah.