Ka sorkar ka la pyllait T.120 klur ka bhah khajna

U Myntri Rangbah ka Jylla u Conrad K Sangma hynne ka sngi ula ther kylla ïa u Nongialam ka Liangpyrshah u Dr Mukul Sangma da kaba ong, ba ka jingsdang ban pyntlot ia ka Garo Hills Autonomous District Council (GHADC) ka dei naduh ka por ba ïalam ka Congress ia ka Executive Commitee. Lah ban kdew dangshen u Nongialam ka Liangpyrshah u Dr Mukul Sangma uba dei ruh u Myntri Rangbah barim ka Jylla ula kynnoh ba ka Sorkar MDA ba mynta ka kwah ban pyntlot ia ka GHADC, namar la palat 42 bnai ki nongtrei ka Council kim ioh tulop bym pyllait ka Sorkar ia ka bhah tyngka. Haba kren sha ki lad pathai khubor u Conrad ula ong, ba ka GHADC ka sdang tlot ka rukom treikam naduh ba synshar da ka EC ba ïalam ka Congress namar ka jingthungkam laitlan khlem da pyrkhat ia ka pla tyngka jong ka Council.

U Conrad ula ong ha ka por ba ïalam ka Congress ia ka EC, ki don palat 2000 ngut ki nongtrei ba thung ha GHADC bad ka jingpynlut man u bnai ban siew tulop ka long T.6 haduh T.7 klur katba ka jingpynmih pisa na ka Council ka long tang T.1 klur haduh T.2.5 klur. Ula bynrap hadien ba ka NPP ka ioh bat ia ka EC ha GHADC, ka Sorkar Jylla ka la dep pyllait T.120 klur ka bhah khajna bad lyngba kane ka pisa ka Council ka la ioh ban siew tulop ia ki Nongtrei.“Ka Sorkar Jylla ka la pyllait lut ïa ka bhah khajna sha ka District Council. Kam don kano kano ka bhah pisa ba dang sah teng” la ong u Conrad.

U Myntri Rangbah ula ong halor ka jingkynnoh ba ka Sorkar Jylla kam don jingkitkhlieh ban siew tulop ïa ki nongtrei ka GHADC hynrei ka sorkar ka don ka jingkitkhlieh ban ïasam bhah khajana sha baroh ki Council.“Ka jingeh ban siew tulop ba dang sahteng ka dei naduh mynshwa. Ka dei ka jingeh kaba khraw bad ka Sorkar Jylla ka la ai ka jingkyrshan ia ka GHADC da kaba pyllait ha ka por ba biang ïa ka bhah jong ka khajna” ula ong. Ula kynnoh ba ki jingeh ha GHADC ki dei naduh ka EC barim ba la ialam ka seng Congress, na ka jingthung kam be-aiñ. Namar ka council kam shym bud ia ki kyndon thungkam bad kine ki dei ki daw bah ba ki nongtrei mynta kim ioh tulop mynta.