Ka sorkar kan shna 532 tylli ki jaka pynlang um na ka projek CACBWA

U Myntri ka tnad Soil & Water Conservation u Marcuise N Marak ula ong, ka sorkar jylla shen kan sdang ia ka Climate-Adaptive Community-Based Water Harvesting Project na ka bynta ban tei ia ki 532 tylli ki jaka pynlang um ha jylla bad ia kane ka projek yn sdang shwa ha East Khasi Hills District. Haba iakren bad ki nongthoh khubor u Marcuise Marak ula ong, ka tnad Soil and Water Conservation kan sa sdang pyntreikam noh ia ka Climate-Adaptive and Community-Based Water Harvesting Project kaba la bei tyngka da ka Asian Development Bank bad la pyndep ruh ia ka jingkhot tender. U la ong ba ka kam kan sa sdang noh shen bad ka jingpynkhreh ia ka Work Order ka dang iaid shakhmat bad ha ka wat kaba nyngkong yn sdang shwa ha ka nongbah Shillong, East Khasi Hills district.

U la iathuh ba la dep ban pynbna ia ka tender bad lah dep ban pynbeit ia ki kam namar ba ka donkam ba ioh ia ka jingmynjur na ka ADB, kumta shisien ba ka ADB kala ai iaka jingmynjur, yn sa aiti noh ia ka kam sha ki kontraktor ne kompani kiba la shah jied. U Marcuise ula ong hadien ba la pyntrei ia kane ka projek ha Shillong, yn sa pyniar ia ka jingtreikam jong kane ka projek ha rilum Garo ruh bad shen yn sa sdang noh noh ia kane ka projek. Ula ong ba ha ka jingkhot tender ka kynthup ia ki ar tylli ki bynta kawei kadei ka Technical Bid bad kawei pat kadei ka Financial Bid, kumta ki Kontraktor kiba la bit la biang ha ka Technical Bid yn sa plied sa ia ka Financial Bid. Da kaba pynshong nongrim sa ia ka Financial Bid, yn sa aiti ia ka kam.

Haba kylli halor ka jingbuh por ban sdang ia ka rojek, u Myntri sorkar ula ong, “La kumno kumno, ngi lah ban sdang ia katei ka projek ha u bnai Rymphang. Ngi don jingkyrmen ban ioh sdang noh”. “Na ka bynta ka East Khasi Hills district baroh kawei ki don bun tylli ki projek. Ia mynta la dep ban khot tender ha kylleng ki bynta jong ka jylla” bad ula ong, ba ia mynta hi ym lah shuh ban kynmaw haduh katno tylli ki projek la mang ban pyntrei tang hapoh jongka East Khasi Hills hynrei ki don bun tylli.U la ong ba ka sorkar kan ai por kumba 24 haduh 36 bnai ban pyndep ia ka projek bad naka liang jong ka ADB, ki bor sorkar bad ka tnad Soil and Water Conservation kin sa khmih bniah ia ka jingpyntreikam ia ki projek.