Ka VB‑G RAM G kam knieh kam, hynrei ka pynbun ïa ki sngi ïoh bylla, kwah ïalam bakla ka Congress

Ka Meghalaya Bharatiya Janata Party (BJP) hynne ka sngi kala iada iaka aiñ thymmai ka Viksit Bharat‑Guarantee for Rozgar and Ajeevika Mission (Gramin) (VB‑G RAM G) Act 2025, kaba mih bujli haka jaka jong ka Mahatma Gandhi National Rural Employment Guarantee Act 2005 (MGNREGA).Ka ain thymmai (Gramin) (VB‑G RAM G) Act, 2025 ka pynthikna ba ki nong shong shnong kin ioh bylla 125 sngi katba ka ain MGNREGA ka pynthikna ba ki paidbah kin ioh bylla 100 sngi haka shi snem. Haba kren shaki lad pathai khubor u BJP state general secretary u Bah Wankitbok Pohshna u la ong ba ka rai ban wanrah daka VB‑G RAM G Act kadei ban wanrah ka jingkylla ïa ka jingim jong ki paidbah haki thaiñ nongkyndong ha kylleng ka Jylla Meghalaya bad ka ri India.

U Bah Wankitbok u la ong ba kane ka aiñ ka pynheh ïa ka jingkular ai bylla iaki paidbah na ka 100 sngi sha ka 125 sngi na ka bynta kawei ka longïing nongkyndong ha ka shisnem, kaba pynbeit beit ïa ka jingdonkam ba la nang kiew jong ki longïing nongkyndong ha kane ka juk mynta.“Haka jingshisha ka long ba ka Aiñ ka pynïar ïa ki lad ki lynti na ka bynta ki longïing nongkyndong jong ngi da kaba pynbun ïa ka kam kaba la pynthikna, kane ka ain kam shim ïa ki hok hynrei kala nang pynkhlain shuh shuh ïa ki” la ong u Bah Wankitbok.U Bah Wankitbok u la kyntait ïa ki jingkynnoh jong ki Liangpyrshah ba kane ka aiñ kan pynduh ïa ki kam nongkyndong ne pyntlot ïa ki Gram Seva, da kaba ong, “Kaei kaba pynkylla ka long ka jingthmu ha ka jaka jong ka jingïarap kaba shipor, ngi tei ïa ki mar ki mata kiba neh, ki surok, ki nala um, ki skul, wat ki jingtei ha ka imlang sahlang ki ban kyntiew ïa ki pateng bynriew”.

U la ban jur ba ki Gram Sevas ki dang long pdeng ha ka jingthmu bad jingpeit bniah kynthup ïa ka jingpynlong digital pura ïa ka jingsiew bai bylla.U la pynpaw ruh ïa ki saw tylli ki “jinglong ba la batai shai” jong ka Aiñ: ka jingïada ïa ka um, ki jingtei ba kongsan ha nongkyndong, ka jinglah ban ïakhun pyrshah ïa ka jinglong ka suiñbneng kaba jur bha, bad ka jingpynkhreh na ka bynta ki jingjia ba sngewsih.“Ka aiñ ka pynthikna ïa ka jingsiew tulop ha ka por kaba biang bad ka pynbeit ïa ka jingkitkhlieh ban trei khuid iaki kam” u la ong.Ka BJP ka la kynnoh shuh shuh ïa ka seng Congress ba ka pynphriang ïa ki “jingtip kiba ïalam bakla iaki paidbah” da kaba pynskhem ba ka aiñ ka ïada ïa ki bor shnong. Katkum ka jingong jong u, ka VB‐GRAMG Act, 2025, ka long kum ka jingpynkylla dur ïa ka polisi treikam ha nongkyndong, kaba ïahap bad ka jingthmu kaba kham jylliew jong ka Viksit Bharat ha u snem 2047.