Ka jinglehkmen College Week 2026 jong ka Kiang Nangbah Govt College Jowai kaba la sdang naduh ka 20 tarik haduh ka 28 tarik u bnai Lber hapoh ka jingpyniaid ka Kiang Nangbah Govt College Students Union (KNGCSU) ka long kaba jop bad pynshongshit ia ki samla pule bad ki nonghikai, namar ba kane ka taiew lehkmen ka kolej mynta u snem ka kham pher na ki snem ba la dep.
Mynta u snem ki la pynlong bun ki rynsan ban pyntikna baroh ki samla pule kin ioh bynta lang ban kyntiew ia ka sap bapher bapher ba ki don.
Ki rynsan ki kynthup naduh ka jingiakop lehkai sport bapher bapher, ka jingthoh eassy, thoh poetry, drawing, quize, debate, extempore speech, ka jingthoh slogan, spelling bee bad kiwei, nalor ki jingshad jingrwai, ka jingkop Miss bad Mr Kiang Nangbah Govt College.
Nangta katkum ka jingiaid ka juk ka por kila pynlong ruh ka rynsan iakop Digital Platform E-Sport kum ka Efootball, BGMI, kumjuh ka jingiakop shondur mobile, bad shna reels.
Na ka bynta ki nonghikai la don ka jingiakop Musical Chair, Tunnel ball, ka jingpyndap um haki bitor, kiba la wanrah ka jingkmen jingshongshit hapdeng ki nonghikai bad ki samla pule.
Ia kane ka taiew lehkmen ka Kiang Nangbah Govt College la wan ban plie pyrda da u myntri ka tnat pule puthi ka sorkar jylla u Lahkmen Rymbui, katba ha ka sngi pynkut pat la donlang u Abhinav Kumar Singh IAS, Deputy Commissioner ka West Jaintia Hills District.
Na ka liang ki nongialam jong ki samla pule ka college ki ong, na ka liang jong ki ruh ki la trei shitom ban iaid lynti halor ban wanrah ia ka jingkiew jingroi ka college ha baroh ki liang, la ha ka pule puthi, ka lehkai sport, ne jingtei jingshna bad kiwei, ki shim ruh ia ka lad ka kabu ban ai khublei kyrpang ia ka sorkar jylla ban wanrah ia ka roi ka par ka college khnang ba kan kiew ha ki liang baroh.
Ka jingjop ha ka jingiaid lynti ki ong, “Ym dei ba wan jia ryngkhat hynrei dei ka jingiatreilang”.
Ki la ai khublei ia u MLA ka 2-Jowai u Wailadmiki Shylla uba long, u myntri ka tnat Health & Family Welfare, Sports and Youth Affairs, halor ki jingiarap bad jingai mynsiem jong u ia ka college Kiang Nangbah, uba la ai jingmut ban pynlong ka jingiakop ‘Dustbin Design Making’ bad kumjuh ka jingiarap T.50,000 hajar sha kane ka taiaw lehkmen ka college.