Khlad 2 ngut, sha wiang ding ki dukan, pan shipai ki bor District ban iaid ‘Flag March’ ha WGH

Ar ngut ki briew ki la duh ei ia ka jingim ba kordor hynne ka step phyrngap 10 tarik Lber na ka jingther kuli ki pulit ban pynpra ia ki paidbhur ba ialum hapdeng ka korphiw ha ka thain Chibinang, West Garo Hills.

Kane ka jingkulmar bad iakynad hapdeng ki jaidbynriew riewlum bad ki bym dei riewlum ka la mih halor ka jingpyrshah ia ki bar Jylla ban thep kyrteng kum ki kyrtong ha ka ilekshon GHADC ha ka step 9 tarik bad ka la pur sha kiwei ki bynta ka West Garo Hills.

U Superintendent of Police (SP) ka West Garo Hills, u Abraham T Sangma ula ong, “Ki dei ki nongshong shnong ka Chibinang kiba pynkulmar hapdeng ki riewlum bad ki bar Jylla ba ia dei bad ka elekshon GHADC bad ka jingther kuli ka la jia ban pynpra ia ki paidbhur ba ialum beain”.

U SP ula ong ka jinglong jingman ia mynta la lah ban tehlakam hynrei na ka liang ki bor Pulit ki dang iai pahara ha kiwei ki bynta jong ka District.

“Ngi la pan shuh shuh ia ki bor pahara bad ki la don ha lynti mynta” u la ong.

Ha kajuh ka por, u District Magistrate ka West Garo Hills hynne ka sngi ki la pynjari korphiw 48 kynta ha baroh kawei ka district, ka ban treikam naduh 12 baje mynstep ka 11 tarik Lber haduh 12 baje mynstep ka 13 tarik Lber ban tehlakam ia ka jingkynad iapher jaitbynriew kaba la nang jur sha kiwei ki jaka.

Ka jingpynjari ia ka kyndon 163 ka Bharatiya Nagarik  Suraksha  Sanhita (BNS) ha baroh ka West Garo Hills District ka long mana ia ki briew ba kim dei ban mih shabar ha ki kynta korphiw, ula ong ki jingjia thombor ki buh jingma ia ka jingim briew bad ka jingshngain ki paidbah.

Ki bor district ki la shim ki sienjam ba tyngeh ban tehlakam ia ka jingjia kulmar bad thombor ban wanrah ia ka shongsuk shongsain ha ka thain.

Ka hukum ka bthah ia baroh ki jaka pule, ki bank, ki dukan, ki iew bad ki ophis ba kin khang khyrdep, lait noh ki jingshakri ba donkam he kum ki hospital, ki pharmacy, bad kwei kiwei.

Baroh ki nongpyntreikam ia ka ain, ki Executive Magistrate bad ki Heh Pulit hapoh ka District la bthah ba kin pyntrei pyrkhing bha ia kane ka hukum bad ban leh ia kaba donkam pyrshah ia kino kino ki briew kiba pynkhein ia ka korphiw.

“Kino kino ba pynkhein kin shah pynshitom hapoh ki kyndon 223 ka BNS” ong ka hukum.

Ka jingpynjlan korphiw ka long hadien ka jingther kuli ki pulit kaba shim ia ka jingim ki ar ngut ki nongshong shnong ka Chibinang, ki jingwiang ding ia ki dukan ha Chibinang Bazaar.

U District Magistrate ka West Garo Hills ula thoh sha u Commanding Officer ka 101 Area, Eastern Command bad kyrpad ia ki shipai ban pynlong da ka ‘Flag March’ ha ki 37 tylli ki shnong ba don ha ki jaka them ka District.

“Nga kyrpad ia ki shipai ban pynlong ia ka jingiaid pahar ne Flag March ha ki jaka them ka West Garo Hills ban wanrah biang ia ka shongsuk shongsain ha ka thain” la ong bad bynrap ki bor district ki la khang ia ki kor internet 48 kynta ha baroh kawei ka district ban tehlakam ia ka jingsaphriang ki khubor hamsaia kiba ialam bakla ia ki paidbah.