Khlem tei jaka mane blei, ka dei ka meditation centre, pynshai u DIG sha ka HYC

Ka seng Hynniewtrep Youth Council (HYC) hynne ka sngi ka la leit kynduh ia u heh ka Central Bureau of Investigation (CBI) ha Mawdiangdiang, Shillong ban pan jingshai halor ka jingmih ka jingtei kaba I long kum ka jaka mane blei hapoh ka phyllaw kane ka ophis. Kane ka jingleit kynduh ki nongialam ka seng, ka long hadien ba kila ai jingujor bad pan jingshai shwa ha kane ka taiew kaba la dep na kane ka ophis kaba khlem ai satia ka jubab. Haba kren sha ki lad pathai khubor, u President ka HYC u bah Roykupar Synrem ula ong ba ha ka jingiakynduh, u DIG ka CBI ula pynshai ba kam don kano kano jingtei mane blei hynrei ka dei tang ka jingtei ban kilanmet ne meditation centre na bynta ki nongtrei kiba shong ba sah ha ki Quarter jong ka CBI ophis.

U bah Roykupar ula ong ba ka seng kam pyrshah ia kano kano ka niam hynrei ki ophis sorkar kim dei ban pyni ia ka jingiashah niam namar ba ka ri India ka dei ka bym iashah ia kano kano ka niam.“Ka ri India ka dei ka ri ka bym don kano kano ka jingiashah liang ia kano kano ka niam, hynrei lada mih kaba kum kata ka jaka mane Blei hangne ha ophis treikam ka CBI, ka pynpaw ba kane ka ophis kam don shuh ka jinglaitluid,” ong u bah Roy. Ha kajuh ka por u bah Roy, ula ong ba lada dei ka jaka kilan met ka seng kam pyrshah hynrei lada jia ba ka CBI ne ki nongtrei ki shna ne ki pyllong kum ka jaka mane Blei, ka seng kan ieng pyrshah ia kane.

Halor kane, na ka liang ka seng kan iai pyllong ia ka jingpeitngor nangne shakhmat, khnang ba kin nym don ka jingpykylla hadien habud.“Ngi ngeit ba u DIG un bat ia ka jingkren jong u, bad ngi la kren shai ba lada ki pynkylla ia kane ka Meditation Centre sha ka jaka Mane Blei, ka seng kan sa shim da kiwei ki lad ki lynti,” ong u President ka HYC.