Khluit ka iingdorbar halor ka ILP, kura miej u Bah Ardent, pynsangeh shipor Lamphang ia ka Dorbar

U Lamphang ka ïing dorbar thawaiñ ka jylla u Thomas A Sangma hynne ka sngi, ula hap ban pynsangeh 10 minit ia ka Iing Dorbar hadien ba ki dkhot ka Iing dorbar na ki arliang mamla ki la iakhluit na ka jingiatai halor ka mat iatai ka Inner Line Permit (ILP) ha Iing Dorbar.

Ha ka jingiatai ia kane ka mat, hapdeng u Myntri Rangbah ka Jylla u Conrad Sangma bad u Nongialam ka Liang Pyrshah u Dr Mukul Sangma u la dawa ia u Myntri Rangbah ban jubab beit da kaba ong, ‘Hooid’ ne ‘Em’ halor ka jingshimkhia ka sorkar jylla ia ka ILP bad ka sorkar pdeng, hynrei na ka liang u Myntri Rangbah ula kyntait ban jubab da kaba ong ‘Hooid’ ne ‘Em’ hynrei un ai ia ka jubab ba bniah khnang ba baroh kin tip ia kaei kaba ki la leh bad ula kynnoh ruh ba ka sorkar kaba rim ka la pulom bad kim shym la leh eiei halor kane ka mat.

Hadien kane u MLA ka Nongkrem u Bah Ardent M Basaiawmoit ula kynnoh ba ka sorkar jylla kam shym la shimkhia ban iakren bad ka sorkar pdeng halor ka jingdawa pyntreikam ia ka ILP bad ula ong, ba ka jingpyntreikam ia ka ILP ka long kaba donkam ban iada ia ka jingwan rung kyrthep ki briew na kiwei ki jylla bad kumjuh na kiwei ki ri.

U nongialam ka VPP u Bah Ardent ula ieng bad kura ia ka miej, namar bym hun ia jubab kaba wanrah shuh ka jingkawang ktien hapdeng u Myntri Rangbah bad u Symbud Rangbah.

Haba jubab u Myntri Rangbah ka Jylla ula ong, ba u la ai jingthoh bad iakynduh la bun sien ia u Myntri Rangbahduh ka ri bad ia u Myntri kam Pohiing ka Ri halor ka ILP bad u la buh jingkylli kylla ba katno sien u dkhot bad u nongialam ka Liang Pyrshah ki la leit iakynduh ia u Myntri Rangbahduh ka ri bad ia u Myntri kam pohiing ka Ri.

U Bah Ardent ula ong, “Lada u Myntri Rangbah u kynnoh ia nga, Nga donkam ban kylli ba katno sien ka Sorkar ka la khot lang ia ki khnang ba ngin ia leit iakren lang sha Delhi. U MP jong ngi (VPP) ula kren ia kane ka kam”.

U Conrad u la jubab da kaba ong, “Ka jingshimkhia jong ngi ka dei ha ka kam. U long laitluid ban leit bad iakynduh ia u Myntri kam Pohiing. Ban shu ai jingkren hi ka biang palat, hynrei ia ngi, ngim ju kren than ngi ngeit ha ka kam. Ngi kmen ba ka Liang Pyrshah kan iatreilang bad ngi. Phi bud dien ha la ka jong ka kyrdan. Ngi pdiang ia kane ka jingai jingmut, hynrei wat pyndonkam ia kane ka iing dorbar ban ong ba ka Sorkar kam shimkhia satia. Kam don jingbakla ban wad ia kiwei ruh ki lad jingiada. Ka jingthmu jong ngi ka long ban wad ia ki lad ki lynti ban tehlakam ia kane ka kam bad ngin iai bud dien beit ia ka ILP”.
U Lamphang ula pynsangeh noh 10 minit ia ka dorbar namar ka jingiatai ka la khluit bad bteng biang ia ka Dorbar, u Myntri Rangbah u la ong, ka Sorkar ka dang iai buddien ia ka Inner Line Permit (ILP) bad ka wad ruh ia kiwei ki lad jingiada hapoh ka Immigration and Foreigners Act, 2025.

Na ka liang u MLA ka North Shillong u Bah Adelbert Nongrum ula kynnoh ia ka Sorkar ba ka shu pynbiej ia ki paidbah halor ka ILP bad u Myntri Rangbah ula kynnoh kylla ba lada don mano mano ba pynbiej, dei hi ma u ba pynbiej.

Katba u Symbud Myntri Rangbah ka jylla u Bah Prestone Tynsong ula ong, lada u Bah Adelbert u ong ba ki shu pynbiej u dei ban pynshisha halor jingkynnoh pynbiej bad u Lamphang ula tuklar ia kane ka jingiakhluit ban pynjai jai ia ki dkhot bad pyntip ba ka por kylli jingkylli ka la kut.