Khmih lynti ki paidbah ban plie ia ka Multipurpose Indoor Hall ba T.2.78 klur ha Mawthengkut

Hadien jan shisnem naduh ba la buh maw nongrim ïa ka Multipurpose Indoor Hall ha Mawthengkut da u Myntri Rangbah ka jylla u Conrad Sangma ha ryngkat ka jingiadonlang u Bah Methodius Dkhar, MLA ka thain katei ka projek ba heh mynta la jan dep lut syndon. Ka jingïeng jong katei ka Hall ka la pynkmen bad ai jingkyrmen ia ki paidbah jong katei ka dong ka thain̈.

Katei ka Multipurpose Indoor Hall kaba don ar tylli ki court, ïa kaba la tei ha ka jinglut ba kot palat T. 2.78 klur, ka la sakhi ïa ka jingstet jong ka kam ha kine ki bnai ba la dep. Haba leit jurip ïa ka jaka, la ïohi ba bun bynta ka jingtei, kynthup ïa ki balcony, ki jaka leit bar bad kiwei pat ki jingdonkam ba kongsan la dep pyndep lypa bad ka sah satang khyndiat ki kam pynkhreh ba khatduh.

Haba kren sha ki lad pathai khubor, ki samla nongïalam ka Mawthengkut ba kynthup ia u samla Shahkhana Iawphniaw, Bah W. Nongbri bad kiwei kiwei ki la pyntip ba kumba 90 persen ei ei jong ka projek la lah ban pyndep. Ki la pynpaw ruh ïa ka jingkyrmen ba shen yn sa ioh ban plie paidbah noh ïa katei ka Hall ha ki por kiba lyngkot.

“Ngi dang ap khmih lynti ïa ka sngi ba yn plie paidbah noh ïa kane ka Indoor Hall, namar kaba sah mynta ka dei tang katto katne ki kam ba khatduh kynthup ïa ka bording, ka umbam umdih bad kiwei ki jingpyndep,” ong ki samla nongïalam”.

Ha kajuh ka por, ki la pynpaw ruh ba katei ka Indoor Hall kan long ka jingkyrkhu kaba khraw bad ka jingkyrshan kaba donkam eh ïa ka liang ka jingïalehkai bad ka roi ka par jong ki samla ha ka thaiñ Mawshynrut baroh kawei.

U la bynrap ruh ba la khmih lynti ba katei ka Hall kan long ka pdeng ba kongsan na ka bynta ki jingïalehkai bad ki prokram paidbah, kaba yn wanrah jingmyntoi ïa ki paidbah jong ka thaiñ ha ki snem ban wan.