Khrui poi ki nongrep ha khmat Secretariat ryngkat ki jhur ki soh

Ki nongrep ka jylla hapoh ka lama jong ka Hills Farmers Union (HFU) hynne ka sngi ki la ialum khrui hakhmat khyrdop Secretariat ban leit pynsngew sha ka sorkar ia ki mat jingdawa ba ki nongrep ki iakynduh ha ka rep ka riang.Ha kane ka sngi la iohi ba ki nongrep ki la ialum ha Secretariat ha ryngkat ki jhur ki soh ban ai sngewbha ia ka Myntri ka tnat ka rep ka riang ka kong Ampareen Lyngdoh bad ban pynsngew ia ki jingeh ba ki nongrep ka jylla ki iakynduh. Hadien katto katne por, na ka liang ki nongialam ka seng ki nongrep ki la iakynduh ia ka Myntri bad ki la aiti ia ka dorkhas ban dawa ban wanrah ia ka Market Intervention scheme ban kyrshan ia ki nongrep, ban tuklar halor ka jinghiar dor ki mar rep, ban ai jingkyrshan ia ki nongrep kiba shah ktah haka jinglyngshop ka mei mairang, ban mang tyngka kyrpang ban ai jinghikai iaki nongrep halor ka rukom pyndonkam shoh dawai (Fertilizer).

Ha ka jingialang jong ki nongrep bad ka Myntri kaba la neh kumba 2 kynta tam eiei, ki nongrep ki la dawa ruh ban pyntreikam da ka Data Collection System ban lum jingtip halor ka jinglah pynmih mar rep, ban pyntreikam ia ka Regulation of Market Price Cuts lane ban pynduh noh ia ka Ot Kilo, ban thaw da ka Agriculture Policy, ban pynsted ia ka rukom pyllait pisa na ka skhim Focus sha ki Producer Groups, ban pynkiew ia ka song jingiarap pisa bad ban pynkiew ka song pisa jingiarap jong u synsar na ka skhim CM Assured.Hadien ba wai ka jingialang ka Myntri ka rep ka riang ka la leit hi da lade sha phyllaw u Soso Tham, ban ai khublei bad ban pan map na ki nongrep kiba la ap shitom.Ka kong Ampareen haba kren sha ki lad pathai khubor, ka la ong ba ka la ai jingmut ia ki nongrep ba ha ka jaka ba kin shim ia ka Market Intervention Scheme, ki la dei ban leh da ka Crop Insurance Scheme kumba buh insurance ia ki kali.

Ka la ong ba haduh mynta ki don 30 hajar ngut ki nongrep kiba la rejistar ha kane ka Crop Insurance skhim bad ka tnad ka la rai ba kan don ka jingiakynduh lang bad ki nongrep ha ki kyntoit lyngba ki Block , khnang ban ai jingtip sha ki nongrep haba iadei bad kane ka skhim.Ha kajuh ka por, na ka liang ka Myntri ka la kular ruh ha ki ba ka Sorkar kan sa bishar bniah halor kitei ki mat jingdawa kiba ki nongrep ki buh bad pynsngew ha katei ka jingialang.“ Wat duh jingkyrmen namar ba kane kadei ka sorkar ba treikam. Ngam tip haduh katto kita ki jingdawa ki lah ban urlong hynrei nga tip ba ngin nym shong kli kti,” ong ka Myntri ka rep ka riang.