Khuslai ki paidbah ha thaiñ Nongpoh ba duna pynpoi ‘Gas’ ki Agency

Ki paidbah nongpyndonkam ia ki tyndong shet jingshet da ka gas ha thaiñ Nongpoh ki la khuslai namar ka jingsdang duna ka jingpynpoi ia ki tyndong gas da ki agency bapher bapher, ha kaba mynta ka step ka la mih ruh ka jingiania hapdeng ki paidbah bad ki nongpyniaid ia ka gas agency ha Mawtnum hajan Nongpoh.

Halor kane ka jingeh ki paidbah, na ka liang ka ophis u Deputy Commisioner ka Ri Bhoi District, mar mar ula lum ia ka jingialang hapdeng ki nongpyniaid ia ki gas agency ha ryngkat ki ophisar ha kaba la thaw ruh ia ka District LPG Supply Monitoring Committee ban khmih halor ka jingpynbiang ia ki gas bad ki jingeh ki nongpyndonkam gas.

Haba kren bad ki Nongthoh Khubor, u Abhilash Baranwal Deputy Commisioner, u la pynpaw ba hadien ka jinglong jingman na ka thma ka la ktah shisha ha kaba ia dei bad ki pynbiang ia ki tyndong gas hynrei la ong ba ki paidbah kim dei ban khuslai namar ka jingshalan ka dang biang bad ba ki paidbah kin ap katkum ki pali ba ki la book ia ki tyndong gas.

U la iathuh ruh, ba halor kane ka jingeh ki paidbah, na ka liang ka sorkar ka la bthah ban thaw da ka committee kaba kyrpang ban khmieh ia ki jingpynbiang tyndong gas bad ruh ia ki jingdonkam jong ki paidbah, kumjuh ruh ban peit ia ka jingpynpoi gas na ki kompani kiba ju pynbiang ia ki tyndong gas.

U la ong ruh, ba lyngba kane ka committee yn lum ruh ia ki list jong kito kiba pyndonkam ia ki commercial gas ban pyntikna ba ma ki ruh kin ioh ia ka la ka bhah, u la ong ruh, ba ki paidbah kin hap ban bud ia ki kyndon jong ka sorkar da kaba book ia ki gas katkum ki por ba la batai katai ha ki thaiñ sor ka por booking kan long 25 sngi bad sha ki thaiñ kyndong kan long beit 45 sngi bad kyrpad ruh ia ki paidbah ba kim dei ban khih khuslai namar na ka liang ka sorkar jylla hi ka dang ialeh ban pynbiang ia ki jingdonkam ia ki tyndong gas.

Halor ka jingeh ba la mad da ki gas agency, na ka liang u trai ka Ri Bhoi Gas Agency u Bah Victor Maxx Rynjah, u la iathuh ba kum ka agency ka la mad jingeh ban pynbiang ia ki tyndong gas namar ka jingduna jong ki gas hynrei u la ong ba ki paidbah kim dei ban khuslai namar na ka liang ki company kiba ju pynpoi gas ki la kular ban pynpoi ha ka por kaba biang.

U la pynpaw ruh, ba kum ka agency ka dei tang kaban pynpoi ia ki gas bad kin hap khmieh lynti na ki kompani kiba ju pynpoi, kumta la kyrpad ia ki paidbah ba kim dei ban khnium ne buh jingsyier ruh wat ia ki nongleit sam gas lane ki delivery boys namar ka jingklumar jingmut ki paidbah nongpyndonkam gas.

Na ka liang ka Synjuk ki Rangbah Shnong ka Ri Bhoi District, lyngba u Bah BB Makdoh u la pynpaw ia ka jingsngewkhia halor ka jingmad jingeh jong ki paidbah ha kaba ia dei bad ka jingpynbiang ia ki jingdonkam tyndong gas, kumta u la kyrpad ia ki bor sorkar ban shimkhia mardor halor kane ka jingduna jong ki tyndong gas ha ka por kaba biang.