Ki 37 ngut ba la pyndep jinghikai kin la ïoh jingtrei bad ka EWPL

Ka Meghalaya State Skill Development Society (MSSDS),  lyngba ka Skills Meghalaya, mynta ka sngi ka la sam ia ki syrnod sha ki 50 ngut ki samla kiba la pyndep noh ia ka jinghikai ha ka Organic Dyeing, Spinning bad Weaving kaba la pynlong da ka Eri Weave Private Limited (EWPL), ha ka shnong Kdonghulu, Ri Bhoi District. Ki samla kiba la pyndep ia kane ka lad ai jinghikai ki dei kiba na ka thain Bhoirymbong, kiba la ïoh ban ïashimbynta ha ki prokram ai jinghikai kaba shitrhem kaba la iaid kumba 50 sngi halor ka jinghikai ban nang ban tip ia ki sap. Ha kane ka jingïalang, la sam ruh 27 tylli ki masin lyngba da ka SELCO bad ka MOSONiE Socio-Economic Foundation.

Kumba 37 ngut kiba la pyndep ia ki jinghikai ki la ïoh jingtrei bad ka EWPL, kaba dei ka bynta kaba kongsan ban ieng ha la ki jong ki kjat. La wan ïa shim bynta ha kane ka prokram da u MLA Umroi, u Bah Damanbait Lamare, MDC Umroi Bah R. Kharbuki, ka Director EWPL ka Kong Iaishah Rymbai, u SDO MSSDS Samuel Nonglait bad kiwei kiwei. Ha ka jingkren jong u, u Damanbait Lamare u la pynpaw ia ka jingsarong bad ka jingsngewkmen kaba khraw ban ïohi ia ki jingjop jong kitei ki 50 ngut kiba na ka constituency jong u, bad u la kyntu ia ki ban shimkhia ia la ka kam bad ban treikam khlem kano kano ka jinglehrain lane ka jingsheptieng ban kot sha ka thong.

“Katno ka kam kaba ngi trei ngin hap ban trei bad ka jingshimkhia bad ban burom ia ka, tang da ka jingtrei shitom bad ka jinglen lade ngin lah ban poi sha ka thong jong ka jingjop bad ban kiew ha ka jingim,” ong u Lamare.