Ki bos STEMS ki ai jingshakri ka 1900 ki khynnah skul

Ka Chief Executive Officer ka kong Isawanda Laloo, kaba peit ia ka jingpyniaid ia ki bos STEMS (Sustainability Transport Efficient Mobility Society), ka la iathuh ba la don ka jingiakren bad ka MTC na bynta ban iarap ia ki khynnah skul kiba lah ban duh na ka jingpynsangeh jong ka ban shakri leit buh leit shaw skul naduh u bnai Iaiong, 2026. Katkum ka jingiathuh ka kong Isawanda, ki bos STEMS ha kane ka jylla baroh ki don 60 tylli bad haduh mynta ka la lah ban ai jingshakri sha ki 1900 tam ki khynnah skul jong ki 33 tylli ki skul ha kane ka jylla.

“Kine ki bos ki dei kiba don 30 tylli ki jaka shong, bad kiba 24 tylli ki jaka shong. Ki don 56 tylli ki lynti iaid ba kine ki bos STEMS kila ai ka jingshakri kylleng ka nongbah watla kim pat lah ban ai lut sha baroh ki shnong,” ong ka kong Isawanda. Ka la ong ban lah ban ai jingiarap bad ai jingshakri shuh shuh sha kiba bun khynnah skul, ka sorkar jylla ka la pynkhreh ban pyniar ia ka jingshakri jong kine ki bos sha kiwei ki shnong ha ka nongbah bad ka la don ka jingpynkhreh ban pyniar ia kane ka jingshakri sha ki nongbah kum ha Jowai bad ha Tura ruh.

Ka kong Isawando ka la ong ba kaba kongsan ka bos STEMS ka long ba ki khynnah ki dei ban long shngain, kaba biang por bad ka jingpyniaid kaba biang nadong shadong. Ka la iathuh ba dor ha ka shi bnai ka long T.1200 tang kiba iaid hapoh 5km, naduh 5-10 km ka long T.1500 katba 10 km kan long T.1800 shi bnai. Katba ia kito kiba don 3 ngut ki khun, kin pyllait ei ia iwei i khynnah skul kiba dang rit tam. Ka jingwanrah ka sorkar ia ki bos ban leit shaw bad leit on skul ha ka nongbah Shillong, ka la iarap ia ki longiing bad kumjuh ia ki khynnah skul bad ka pyllait ruh na ka jingdheng kali ha ka nongbah Shillong.