Ki District Council kim dei shuh kiba laitluid kumba aibor ka Constitution: Dr Mukul

U Nongialam ka Liangpyrshah u Dr Mukul Sangma hynne ka sngi ula kam ba ka jingkwah ka Sorkar Jylla ban kitkhlieh hi ban siew tulop ia ki nongtrei jong baroh 3 tylli ki District Council, ka pyni ba ka Sorkar ka kwah ban pynduh ia ka jinglong laitluid (Autonomy) jong ki District Council.Haba kren sha ki lad pathai khubor u Dr Mukul ula buh jingkylli, “Hato haei la thoh ha ka ka riti synshar ka ri India ba ka Policy jong ka Sorkar Jylla ka lah ban iaid lait lane kham khlaiñ ban ia ka riti synshar ka ri India (Constitution). “Sa tang ka Sorkar Jylla kaba lah ban jubab kham bha halor kane” ula ong.

U Dr Mukul ula kynnoh ba ka Sorkar Jylla ruh ka dang sah um dum namar, wat ki Myntri Sorkar na ka por sha ka por ki la kren shai ba ki District Council ki long kiba laitluid (Autonomous).Ula ong ba kane ka mat ka dang don hapdeng ka jingkulmar jingmut, kumno ban shim ia ki sienjam ban pynkhlain ia ka rukom treikam ki District Council kiba la ai bor da ka khyrnit ba hynriew jong ka riti synshar ka ri India.

“Ka jingbym shai na ka liang ka Sorakr haba ia dei bad ka jingtyrwa ban siew tulop ia ki nongtrei jong baroh 3 tylli ki District Council ka paw shai ba ka Sorkar ka kwah ban tuklar ia ka jinglong laitluid ki District Council kiba ioh bor lyngba ka khyrnit ba hynriew ka riti synshar ka ri India” la kynnoh u Dr Mukul.U Nongialam ka Liangpyrshah ula ong ba ha ka jaka ban siew tulop ia ki nongtrei ka Sorkar ka dei ban shim ia ki sienjam ba khlaiñ ban pynthikna ba ki District Council kin dang iai khlaiñ ha ka rukom treikam, khnang ba kin nanglah ban pyntyllun ia la ki kam bad ha kajuh ka por kin lah ban pahuh ka jinglah ban pynmih pisa katkum ki kyndon ain.